Trun: Iniziativa da fusiun na saja betg pli realisabla

Venderdis saira ha la radunanza communala da Tujetsch refusà l’iniziativa per lantschar contractivas da fusiun en la Cadi. Pervia da questa decisiun ha il cussegl da vischnanca da Trun betg votà ier saira sur da l’iniziativa.

Trun Bild in Lightbox öffnen.

Legenda da maletgs: Trun RTR

Quella na saja betg pli realisabla en questa furma, èsi vegnì ditg en il cussegl da vischnanca. Mo tuttina han cusseglieras e cussegliers discutà sur da l'inizativa. La finala ha quai dà duas propostas:

  1. Da far ina votaziun consultativa sur dal text da l’iniziativa (cun excluder la vischnanca da Tujetsch): Il resultat: 6 gea, 6 na, 2 abstenziuns.
  2. Da votar sur d'ina proposta che vul che la suprastanza communala da Trun elavureschia variantas per collavurar ubain fusiunar cun autras vischnancas en la Cadi. Il resultat: 7 gea, 5 na, 2 abstenziuns.

Sco il president dal cussegl Donat Albin ha ditg ad RTR na saja questa proposta dentant lianta.
Plinavant ha il cussegl elegì Toni Pfister vicepresident communal per il rest da la perioda d’uffizi 2015-2017.