Siglir tar il cuntegn

Header

video
Svidada dal lai da Zervreila
Or da Telesguard dals 28.06.2017.
laschar ir. Durada: 2 minutas 35 Secundas.
cuntegn

Surselva Zervreila: svidera da fund vegn derschentada

Cun laschar currer aua tras la svidera da fund vegn ella schubregiada. L’aura da plievgia n’ha betg ina influenza sin quella acziun.

La svidera da fund sto adina esser pronta per pudair svidar dal tuttafatg il lai da fermada en in cas urgent. Uschia sto ella ina giada per onn vegnir derschentada per lavar davent ils sediments che s’accumuleschan sin la svidera durant l’onn e che pudessan impedir il funcziunament da la svidera.

audio
Mezdi: Lai Zevreila – Daco svidar el gist oz?
ord Actualitad dals 27.06.2017.
laschar ir. Durada: 2 minutas 36 Secundas.

Controllar la concentraziun da material en l’aua

Il problem tar quella derschentada è che bler material vegn manà en il flum sut il lai da fermada. Quai po daventar in privel per ils animals che vivan en il flum, cunzunt per ils peschs. Memia bler material fin en l’aua impedescha als peschs da pudair respirar tras las brantschas ed els stenschan. Perquai sto la concentraziun dal material en l’aua vegnir surveglià constantamain. Sche la concentraziun è memia auta, vegn la quantitad d’aua che va tras la svidera da fund reducida.

Maximal 20 mg/l material

L’aura n’ha betg ina influenza sin l’acziun da schubregiar la svidera. La suletta premissa è tenor Gerold Casaulta da las Ovras electricas Zervreila è, ch’il nivel dal lai sto esser sin almain 1’800 m s.m. Uschia saja segir che betg memia bler sediments vegnian lavai en il Rein da Val. Impurtant saja numnadamain che la concentraziun da particlas en l’aua na surpassia betg la limita da 20 mg/l. L’aua che vegni ord il lai da fermada haja ina concentraziun da maximal 10 mg/l, uschia ch’ils animals en il Rain da Val na sajan betg periclitads, era betg sch'i plovia ed ils dutgs laterals transportian era bler material.

Il Rain da Val a Val durant la derschentada da la svidera da fund.
Legenda: Il Rain da Val a Val durant la derschentada da la svidera da fund. RTR, U. Lechmann

Quantitad d’aua betg in problem

Era la quantitad da l’aua ord il lai da fermada n’è betg in problem sch'i plova gia abundant durant che la svidera vegn schubregiada. A Val haja il Rain da Val ina capacitad da ca. 200 m3/sec avant ch’el va surora. Cura che la svidera da fund è averta dal tut culan maximal 20 m3/sec en il Rain da Val. Ina pitschna part, dentant gia quella quantitad auzi il nivel dal flum per 30 enfin 40 cm.

Artitgels legids il pli savens