Siglir tar il cuntegn

Header

video
50 onns Hamilton e emprima badellada a Domat
Or da Actualitad dals 24.09.2016.
laschar ir. Durada: 3 minutas 20 Secundas.
cuntegn

Ulteriur Grischun 50 onns Hamilton a Panaduz – 35 milliuns francs per in nov bajetg

Cun l'anniversari radund e la nov'entschatta datti gist dus motivs per l'interpresa da Hightech da far festa. Venderdi saira vegn fatga l'emprima badigliada sin l'areal da l'anteriura resgia gronda a Domat. Las perspectivas da la Hamilton n'eran en sia istorgia però betg adina tant optimalas.

Il 2001 cur che Andreas Wieland ha surpiglià – suenter in intermezzo tar la Viafier retica e Svizra Turissem – per la segunda giada il timun da la Hamilton, era quella en ina crisa existenziala. Motiv era tenor Wieland la mancanza d'ina clera strategia. La Hamilton fascheva simplamain in zic dal tut. Da lezzas uras èn plazzas vegnidas stritgadas e la Hamilton na pudeva strusch pli pajar las pajas.

L'interpresa ha dentant surmuntà la crisa e fa oz svieutas da passa 300 milliuns francs mintg'onn. Ils facturs per quest success sajan il persunal fitg bun e qualifitgà e la strategia consequenta da sa profilar en las spartas genetica e digitalisaziun, uschia Andreas Wieland. Sut digitalisaziun chapescha el la sparta da roboters, sensurs ed auters sistems per automatisar. La genetica è la sparta medicinala nua che Hamilton producescha tranter auter defibrillaturs, apparats da reanimar u er tecnica per labors.

video
Hamilton survegn ina nova halla da fabricaziun il 1983
Or da RTR dals 23.09.2016.
laschar ir. Durada: 3 minutas 12 Secundas.

Automaziun sco via da success per il futur

Lavurs manualas na sajan betg pli pajablas en Svizra. Persuenter saja il chapital fitg bunmartgà, di Andreas Wieland. Perquai investeschia la Hamilton fitg bler en automatisaziun, pia en sistems che remplazzan lavurs dad umans. In svilup che vegnia a custar bleras plazzas da lavur insacura – dentant betg tar la Hamilton, è Wieland persvadì. Tut quests sistems d'automaziun dovrian era persunas che programmeschian e mantegnian els.

Persvadì da la Svizra, dal Grischun, da Domat

L'iniziativa d'immigraziun da massa pudess far in stritg atras il quint da la Hamilton perquai ch'ella dovra persunal qualifitgà da l'exteriur. Ed il ferm franc svizzer na fa er betg pli simpel la fatschenta. Tuttina è Andreas Wieland sa decidì da bajegiar a Domat. L'argument central per el saja, che la furniziun da material saja segira. La Hamilton stoppia pudair sa fidar da survegnir il material per la producziun, uschiglio na possia ella betg furnir a ses clients e quels giajan en consequenza tar autras fatschentas.

video
Hamilton tschertga novs emprendists
Or da Telesguard dals 23.09.2016.
laschar ir. Durada: 3 minutas 31 Secundas.

Nizzegiar la festa per infurmar

A chaschun da la festa da giubileum e l'emprima badigliada dal nov bajetg ha l'interpresa nizzegià la chaschun d'infurmar ils giuvens. Hamilton ha envidà classas secundaras e realas da vegnir a Domat per demonstrar las diversas professiuns che la Hamilton porscha.

RR actualitad 07:00

Artitgels legids il pli savens