Avant in onn aveva quai gì num davart dal manader dal departament per economia Jon Domenic Parolini ch'i dettia plirs interessents, che pondereschan da vegnir en il parc d'industria Vial – l'anteriur areal da la resgia gronda a Domat.
Differentas tractativas, dentant anc senza resultats
In da quels interessents era la Kamkorp Group da la Gronda Britannia. Ella sviluppescha e producescha vehichels electrics. Las contractivas cun quella firma n'hajan dentant fin oz betg purtà fritg. E cura che contractivas durian uschè ditg, na saja quai betg in bun segn manegia Jon Domenic Parolini.
I dettia dentant in ulteriur interessent: Ina firma che saja gia uss en la Svizra orientala e tschertgia in nov lieu. Sche quella vegn lura dentant per propi saja anc betg cler, perquai na vul il manader dal departament per economia er betg tradir da tge firma ch'i sa tracta.
Da tut l'areal vegn nizzegiada be ina pitschna part
Fin uss è sulet la Hamilton SA da Panaduz sa chasada sin l'areal ch'è 200'000 meters quadrat gronds. Ella ha construì ina fabrica e vul anc construir ulteriurs bajetgs aifer ils proxims trais onns, quai sche tut va bain, uschia Andreas Wieland il CEO.
La Hamilton dovra uschia dentant be ina fitg pitschna part da l'areal. Il rest è anc liber. 80'000 meters quadrat èn anc reservà per ina resgia. Er qua dettia quai in interessent tenor Jon Domenic Parolini, dentant er qua na po el betg tradir dapli.
In project da generaziuns sco il parc d'industria dovria temp
Parolini punctuescha dentant ch'il parc d'industria Vial saja in project da generaziuns e qua stoppian ins avair pazienza. Quai di er il president communal da Domat Erich Kohler.
I na saja betg uschia ch'i giaja nagut sin l'areal. La vischnanca saja vidlonder da colliar l'areal cun vias, cun energia ed er cun aua. Uschia che l'areal è lura er propi pront cura che las grondas firmas vegnan.
RR actualitad 17:45