Il suveran d'Arosa è sa decidì per la colliaziun da Bike tranter Arosa e Lai era la stad. Il project prevesa d'optimar la situaziun enturn il Corn Cotschen (Rothorn) vers il Gredigs-Fürggli. Ed era la ruta giu dal Hörnli duai vegnir renovada. Il president dad Arosa Lorenzo Schmid è cuntent ch’il suveran dad Arosa sustegnia in ulteriur project turistic.
Bikers e viandants separads
Planisà è in uschenumnà flow-trail da 10 kilometers che duai remplazzar il tschancun da «downhill». Aifer quellas adattaziuns vegnan era gist separadas las sendas per mountainbikers da quellas dals viandants.
Il project custa bun 900'000 francs e vegn finanzià per gronda part cun la taxa sin abitaziuns secundaras. Ils responsabels vulan cumenzar a bajegiar quest'atun, uschia che las novas sendas per bikers e viandants fissan prontas la stad 2018.
Critica davart organisaziuns d'ambient
Gia avant la votaziun avevan organisaziuns d’ambient crititgà il project. Dapli bikers sin las muntognas pudessan per exempel disturbar la selvaschina en lur zonas da ruaus. Che las organisaziuns savessan far in stritg tras ils plans dad Arosa crai Schmid dentant betg. «Nus avain giu contact cun las organisaziuns d’ambient. Sin il pli savessi dar pitschnas midadas tar ina u l’autra chaussa – dentant na betg dapli.»
RR novitads 12:00