Siglir tar il cuntegn

Header

cuntegn

Ulteriur Grischun Citad da Cuira metta in ultimatum: La passarella sto davent

Gia dapi passa trais onns è la «Passerelle» veglia dal museum d'art da l'architect Zumthor deponida tar la «Bettlerküche» sin l'areal da deponia da la citad da Cuira. Uss metta la citad in ultimatum al possessur, l'architect Patrick Gartmann.

audio
Mezdi: Citad da Cuira metta ultimatum: La passarella sto davent
ord Actualitad dals 08.08.2017.
laschar ir. Durada: 2 minutas 19 Secundas.

Patrick Gartmann, l'architect da Cuira che posseda la passarella survegn ina brev da la citad da Cuira. El sto allontanar la passarella enfin la fin da l'onn, uschiglio dismetta la citad ella, sin donn e cust da Gartmann. La citad haja mess a disposiziun avunda ditg gratuitamain in lieu per la passarella, la pazienza saja fin, di Tom Leibundgut. Patrick Gartmann n'è betg stà cuntanschibel.

Cumprà per ina summa da tschintg cifras

Cura che la chasa Sulser è vegnida disfatga en favur dal nov bajetg dal museum d’art grischun, ha l'architect Patrick Gartmann da Cuira cumprà la passarella, perquai ch’il chantun n'ha vesì nagin'utilisaziun per l’anteriura colliaziun tranter il museum d’art vegl ed il bajetg annex. Plans concrets tge far cun la passarella n'ha Patrick Gartmann mai propi menziunà ils ultims trais onns.

Colliaziun da gronda valita

Ils onns otganta è questa passarella vegnida bajegiada per colliar la Villa Planta cun la chasa Sulser, cura ch'il museum d’art e vegnì engrondì sin quests dus bajetgs.

Responsabels per questa renovaziun èn stads ils architects Peter Calonder, Hans-Jörg Ruch e Peter Zumthor. Dapi l’onn 2009, cura che Zumthor ha gudagnà il premi Pritzker, la pli auta distincziun per architects, vegnan las lavurs dad el observadas cun fitg grond'admiraziun.

Ord l'archiv:

video
Telesguard dals 20.01.1990
Or da RTR dals 20.01.1990.
laschar ir. Durada: 3 minutas 45 Secundas.

RR actualitad 08:00

Artitgels legids il pli savens