Siglir tar il cuntegn

Header

cuntegn

Ulteriur Grischun Collisiun fatala cun sontg Nepomuk

La dumengia en damaun las 05:20 è collidà in automobilist (19) a Domat frontalmain cun sontg Johannes Nepomuk. Quai communitgescha la polizia chantunala.

Tenor indicaziuns da l'automobilist saja el sa durmentà curt ed alura collidà frontalmain cun la statua, che ha ina paisa da 1,6 tonnas. La statua è derschada giu dal podest e rutta. Il sontg Johannes Nepomuk e l’auto han subì in donn total. A l’automobilist n’è capità nagut.

La collisiun è chara

L’inscunter cun la statua è char: Il donn munta a dapli che 100’000 francs. Tenor la polizia chantunala aveva il giuven um memia bler alcohol en il sang. Il permiss da conduir è vegnì prendì davent immediat.

La statua n'aveva betg ina leva sort

Tenor in artitgel en il fegl parochial da Cuira saja gia il viadi da la statua dal sontg Nepomuk a Domat stà stentus. Tenor la legenda saja ella stada sin la punt da Reichenau enfin ch’ella saja vegnida bittada durant il temp da la refurmaziun en il Rain. Ils da Domat, catolics, hajan puspè pestgà ora ella.

Cletg en il discletg

Il donn avess anc pudì esser pli aut: L’original da crap da sablun saja vegnì substituì l’onn 2007 cun ina copia fatga dal tagliacrappa Benno Willi, è da leger en il fegl parochial. Il ver sontg Nepomuk, u sia statua, sa chatta sauna en salv en l’entrada da la chasa da scola Tircal.

audio
Bunura: Il sculptur Benno Willi e sia statua dal Sontg Nepomuk
ord Actualitad dals 07.02.2017.
laschar ir. Durada: 2 minutas 43 Secundas.

In dir mument per il sculptur Benno Willi

Il sculptur da Domat en terza generaziun ha gia lavurà sco giuven vi da l'emprima sculptura dal Sontg Nepomuk a Domat. Da lez temp, ils onns 80, ha el pinà il chau. Cura che quella era lura propi atras suenter 250 onns ha el dastgà far avant 10 onns ina nova statua, dal reminent l'unica statua resch nova en il chantun Grischun dapi passa 80 onns. Uschia èsi per el uss anc bler pli grev dad avair la statua concepida per radund 200 onns, gia uss puspè senza chau e bratsch en ses lavuratori.

Sch'i n'è betg pussaivel da pinar ella vegn Benno Willi a satrar ses Sontg Nepomuk. Quai cun in funeral uffizial e sco s'auda sco per il vair Sontg Nepomuk a Prag avant bun 600 onns.

RR novitads 12:00

Artitgels legids il pli savens