Medemamain era il fim dallas chandailas da ferdar. Lezzas èn dentant raras. Sco quai che differents viticulturs han ditg èn las chandailas specialas che stgauldan las vignas vendidas ora en l'entira Europa. Uschia han blers viticulturs gnanc pudì cumprar talas. Els han stuì encurrir alternativas co proteger lur vignas.
Viticultur a Fläsch ha anflà alternativa tar las chandailas
Il viticultur Thomas Marugg da Fläsch s’auda tar quels viticulturs che n’ha betg pudì cumprar chandailas per stgaudar sias vignas. Perquai ha el installà pignas da gas tranter sias vignas che duain stgaudar in zic las plantinas en fluriziun. Las pignas che derasan aria chauda da circa 90 grads pon auzar la temperatura enturn las vignas per circa trais grads. Tar temperaturas tar minus trais grads ni pli fraid pon las pignas dentant n' era betg proteger las vignas.
Era tar las pignas datti cunfins. Tar temperaturas sut minus trais grads na pon quellas betg pli gidar.
Donns en las vignas da Thomas Marugg
Sco Thomas Marugg di, sajan ils donns en sias vignas da total tschintg hectaras fitg differents. Tar las vignas giu en la val èsi stà pli fraid che tar quellas sin las costas. Uschia quinta Thomas Marugg cun dapli donns tar quellas giu en la val. Concret quinta el cun donns da 30% enfin 50%. Tar las vignas els auts cun donns da circa 20%. Natiralmain dependan ils donns anc da blers auters facturs sco per exempel la umiditad ni era la sort da las ivas.
Donns considerabels gia suenter l'emprima notg
L'emprima notg da schelira da mesemna sin gievgia ha gia chaschunà donns immens. Tenor il president da «Vin Grischun», Georg Fromm, sajan las vits alvas dal Chardonnay, quasi disfatgas per 100%. Tar las ivas dal Pinot noir saja fitg different, tut tenor il lieu. Nua che l'erva era gia segada sajan ils donns pli pitschens. Dentant quinta Georg Fromm era tar questa iva che la schelira ha donnegià radund la mesadad.
Gia avant in onn han ils viticulturs gì da cumbatter la schelira. Lura èn els dentant mitschads cun in egl blau.
RR actualitad 06:00
