La differenza da paja tranter um e dunna munta a 19,3% en Svizra. Sin quella problematica less il «Lohnmobil» en la via da la staziun a Cuira far attent cun in'exposiziun ambulanta.
Il «Lohnmobil»
Il «Lohnmobil» e vegnì inaugurà il mars 2015 dal cusseglier federal Alain Berset ed è dapi lura sin turnea tras la Svizra. Dapi glindesdi è el sin visita a Cuira. Il post da stab per l’egualitad da schanzas tranter um e dunna e la centrala da dunnas Grischun han organisà il program accumpagnant da l’exposiziun ambulanta.
En l’exposiziun vegn l’inegualitad da paja tranter um e dunna tematisada. Ins ha la pussaivladad da tadlar istorgias da dunnas pertutgadas e survegna infurmaziuns davart la tematica. La finamira da las organisaturas èsi da tschertgar il dialog cun la populaziun e da far attent che l’inegualitad è anc oz in grond problem.
Ils motivs per l’inegualitad
I dat differents motivs per la differenza da paja tranter las schlattainas. In motiv è ch’ins ha la disa da na discurrer davart la paja. Uschia na s’accorschan ins betg l’inegualitad da paja e na tematisescha er betg ella. In auter motiv è che las dunnas n’han betg la pussaivladad da cumbinar famiglia e carriera.
En il chantun Grischun mancan canortas per uffants. Savens han dunnas era tema da tematisar la malgistadad. La tema da perder la plazza è massa gronda. Quels motivs èn la culpa, che la differenza da paja exista anc oz.
L’inegualitad da paja tranter um e dunna en Svizra
En Svizra munta la differenza da paja tranter um e dunna a 19,3%.
- In terz da l’inegualitad n’è betg declerada e perquai discriminanta. Las dunnas gudognan qua mo pli pauc perquai ch’ellas èn dunnas.
- Dus terz da las pajas pli bassas èn decleradas. Dunnas lavuran savens en clamadas cun ina bassa paja ed ellas n’èn betg uschè bain scoladas sco ils umens.
Dapi 1981 datti ina lescha che di, che dunnas han il dretg sin la medema paja sco ils umens. Mo quella lescha n’è fin oz anc betg realisada ed exista be sin il palpiri. Per ina midada dovri in sforz da la politica e da las interpresas.
Mo era las dunnas ston sa defender. Ellas ston s’infurmar davart las pajas dals collegas ed era davart la paja usitada per lur lavur. Uschia san ellas impedir in’inegualitad da paja. Per Annetta Simeon èsi era impurtant, che la tenuta da la societad sa mida e ch’ins tematisescha la problematica. Perquai stat ella a la via da la staziun e tschertga il discurs cun la glieud sin via.
Ina visita dal Cussegl grond
Il mardi da mezdi han las deputadas dal Cussegl grond gì l’apero tradiziunal tiers il «Lohnmobil». Il cusseglier guvernativ Martin Jäger ha beneventà sias collegas. Per las deputadas èsi cler che l’egualisaziun da paja stuess gia daditg esser il cas e ch’il sustegn da la politica è necessari.