- Il cussegl d'administraziun da la Somedia ha sistì la decisiun da metter ensemen las duas redacziun da la Südostschweiz SO e dal Bündner Tagblatt BT.
- L'editur da la Somedia Hanspeter Lebrument di ch'i saja stà fauss da communitgar avant ch'il cussegl d'administraziun aveva gì invista detagliada en ils plans da fusiun.
- Las redacziuns restan uss separadas - ellas èn pervia da la reducziun da persunal da fin schaner dentant pli pitschnas.
Suenter ch'il cussegl d'administraziun da la Somedia aveva communitgà la sonda passada che las duas redacziuns da la Südostschweiz ed il Bündner Tagblatt na vegnian tuttina betg messas ensemen, crititgescha Hanspeter Lebrument la communicaziun da la direcziuns. Ella haja communitgà davart quels plans da la fusiun da redacziun avant ch'il cussegl d'administraziun haja savì studegiar en detagl quels.
Ins avess stuì studegiar pli intensiv ils plans avant che communitgar. Nua che persunas lavuran san sbagls dentant capitar.
Cussegl d'administraziun less duas redacziuns independentas
Suenter ch'il cussegl d'administraziun haja studegià detagliadamain ils plans da fusiunar las redacziun saja quel vegnì tar la conclusiun ch'els na vulian betg quai. Per els sajan duas redacziuns independentas la soluziun. Uschia ha il cussegl d'administraziun sistì la decisiun che la direcziun aveva prendì e communitgà fin schaner.
Redacziuns sajan savens memia grondas
Producir tuttina bler cuntegn cun pli pauc persunal, quai funcziunia tenor l'editur da la Somedia Hanspeter Lebrument. Redacziuns sajan savens memia grondas, uschia er tar la Somedia. En il futur stoppian quellas dentant er collavurar pli stretg. Uschia tramettia la Somedia tut tenor occurenza mo in schurnalist e betg in per mintga redacziun.
RR novitads 12:00
