Siglir tar il cuntegn

Header

video
Inauguraziun uffiziala da la nova part da l’A13 – cun il surpassadi da selvaschina «Halbmil»
Or da Telesguard dals 08.09.2017.
laschar ir. Durada: 2 minutas 54 Secundas.
cuntegn

Ulteriur Grischun Inaugurada uffizialmain: Nova A13 a Trimmis è averta

La Confederaziun ha avert uffizialmain il nov vial nord da l'autostrada A13 tranter Cuira-nord e Zezras e surdà quel al traffic. Ussa datti er sin quest traject ina strivla da panna ed il abitants pon sa disar vid pli pauca canera da via.

Cun ina pitschna festa d'avertura è il vial nord ussa surdà uffizialmain al traffic. En divers pleds è vegnì engrazià als responsabels da planisaziun e construcziun dal project da 100 milliuns francs. Tranter ils represchentants da la Confederaziun èn stads Jürg Röthlisberger, il directur da l'Uffizi federal da vias ASTRA, il vicepresident sco era divers schefs da posts responsabels per la planisaziun dal project.

audio
Mezdi: Nova A13 (Cuira-nord - Trimmis) uss'averta uffizialmain
ord Actualitad dals 08.09.2017.
laschar ir. Durada: 3 minutas 19 Secundas.

Il chantun Grischun è stà represchentà cun il cusseglier guvernativ Mario Cavigelli ed ils represchentants da l'Uffizi da construcziun bassa, l'Uffizi per guaud e privels da natira sco era da l'Uffizi d'ambient. Ed er divers funcziunaris da la vischnanca da Trimmis èn stads envidads ed han purtà lur engraziament.

«Halbmil», la punt da muntada naziunala per la selvaschina

En connex cun las lavurs da construcziun ha l'Uffizi federal da vias er reconstruì la punt da selvaschina «Halbmil», in corridor da selvaschina da muntada naziunala. Quel era interrut entras la via naziunala A13 ed ils binaris da viafier da la SBB e la Viafier retica.

Ussa è il corridor avert e la selvaschina po passar senza impediments. La punt da «Halbmil» ha custà 10 milliuns.

audio
Bunura: Ils tschiervs na vulan anc betg ir sur la punt
ord Actualitad dals 08.09.2017.
laschar ir. Durada: 1 minuta 42 Secundas.

Animals anc betg intgantads da lur punt nova

Dapi il december passà pudessan ils animals duvrar la punt. Enfin uss n'èn ils animals dentant anc betg uschè intgantads. Sulet vulps, taiss e fiergnas han duvrà ella, uschia il guardiaselvaschina da Trimmis René Gadient. Enfin ch'ils animals pli grond sco tschiervs e chavriels dovran ella possia quai anc ir in mument.

Insumma na saja la punt anc betg finida. I vegn anc plantà plantas e chaglias per ch'ils animals survegnan dapli gust da duvrar ella.

Via libra sin l'autostrada

Per ils automobilists è l'autostrada averta gia intgins dis. Els na vegnan betg pli tangads da las ultimas lavurs che vegnan anc fatgas. L'anteriur vial nord vegn ussa disfatg cumplettamain. Questas lavurs n'èn anc betg terminadas.

La construziun dal nov vial ha durà pli pauc temp che quintà. Las diversas lavurs da recultivar, da far novas sendas ed era da renatiralisar l'anteriur vial nord duran anc fin la fin dal 2018, uschia ha communitgà l'ASTRA.

RR actualitad 11:00

Artitgels legids il pli savens