Il december passà haja la polizia da Cuira lubì ina vendita da dumengia dapli che quai che la lescha da la citad lubeschia. Tenor lescha dat i duas venditas da dumengia ad onn.
L'Unia punctuescha che la citad ed ils partenaris socials avevan chattà il 2011 ina schliaziun areguard las uras d'avertura dal negozi. Cun sia pratica actuala da lubir venditas supplementaras pericliteschia il Cussegl da la citad questa cunvegna. La citad na dastgia betg sa suttametter al squitsch dals grossists.
Unia n'ha betg contactà citad
Tenor la lescha da la citad da Cuira èsi dentant pussaivel da lubir ulteriuras dumengias, uschia Urs Marti, il president da Cuira. En in artitgel supplementar vegni reglà la pussaivladad da dar lubientschas sch’i dat dumondas.
E dumondas per arver las fatschentas ils 27 da december 2015 haja quai dà, uschia Marti. Tge che disturbi el saja che l’Unia n’haja betg contactà la citad. I saja surprendent ed er in zic dischplaschaivel ch’i vegnia renfatschà a la citad in surpassament da la lescha.
Quantas dumengias che las stizuns dastgan avair avert il 2016 n’è anc betg cler. Quai vegnia pir decis.
RR novitads 14:00