Siglir tar il cuntegn

Header

cuntegn

Ulteriur Grischun Museum d'art dal Grischun – artists pretendan scleriment

Al museum d'art dal Grischun datti midadas en la direcziun. Il directur actual Stephan Kunz surpiglia a partir d'immediat il post da curatur principal. Almain per in onn surpiglia Nicole Seeberger la posiziun sco directura.

Lavurs internas n'han betg funcziunà

Tschertas lavurs entaifer il museum n'hajan betg funcziunà sco giavischà. Quai saja il motiv principal per la midada, ha ditg Martin Jäger, il schef dal departament d'educaziun, cultura e protecziun da l'ambient envers RTR. Tgeninas lavurs precis n'ha Martin Jäger betg vulì dir:

audio
Mezdi: Posiziun Martin Jäger
ord Actualitad dals 14.06.2017.
laschar ir. Durada: 14 Secundas.
[Il directur] sto er surpigliar bleras lavurs che n'èn betg visiblas anoravers e qua n'ha betg tut fucziunà sco spetgà.
Autur: Martin Jäger schef dal departament d'educaziun, cultura e protecziun da l'ambient

Stephan Kunz haja ina gronda affinitad tar l'art, fatg exposiziuns fitg interessantas e posiziunà bain il museum. Dapi la renovaziun e cun il nov bajetg haja la chasa dentant tut autras dimensiuns e sfidas.

audio
Saira: Museum d'art - renfatschas dals artists envers Martin Jäger
ord Actualitad dals 16.06.2017.
laschar ir. Durada: 1 minuta 46 Secundas.

Qua saja Stephan Kunz sco curatur principal en il dretg lieu, uschia Martin Jäger vinavant. Il nov post è tenor Martin Jäger vegnì offrì a Stephan Kunz e quel haja acceptà l'offerta.

Artists grischuns pretendan sclariment

La federaziun dals artists grischuns pretenda che Martin Jäger mettia las cartas sin maisa ed infurmeschia. Quel però na di il mument però nagut dapli. Sch'il schef dal departement d'educaziun, cultura e protecziun da l'ambient na di vinavant nagut, vulan ils artists ir sin las bariccadas, ha ditg il co-president da visarte Lukas Bardill. P. ex. cun ina petiziun.

Nicole Seeberger.
Legenda: La nova directura dal Museum d'art dal Grischun Nicole Seeberger. mad

La nova directura sto anc mussar tge ch'ella sa

Nicole Seeberger (36) surpiglia il post sco directura ad interim. Martin Jäger è persvas da sias abilitads e ch'ella saja la dretga persuna per quest post. Tuttina stoppia ella anc mussar quai e perquai hajan ins decis da surdar ad ella il post ad interim. Seeberger lavura gia dapi il 2009 en il Museum d’art dal Grischun. Avant ha ella lavurà plirs onns en la Chasa d'art a Zug.

Midada gia daditg planisada

Tenor il Departament da cultura stettia la midada en connex cun ina restructuraziun gia daditg planisada. Stephan Kunz era directur dapi l’october 2011, lura era el vegnì da la Chasa d’art Argovia.

RR novitads 11:00

Artitgels legids il pli savens