Las lavurs da conservaziun da l’onn passà han purtà a la glisch novas enconuschientschas da vart ils frescos da Sogn Gion. Quels èn per part da l’enconuschent Maister da Vuorz. Ils auters frescos, main maisterils, vegnivan fin ad ussa attribuids ad in auter pictur, numnà il Maister da Razén. Ma tenor il restauratur Oskar Emmenegger èn quests frescos betg d'in Maister da Razén, mabain d'in gidanter dal Maister da Vuorz. Tar questa conclusiun è Oskar Emmenegger vegnì suenter ch’el ha analisà la tecnica da malegiar durant las lavurs da conservaziun.
Ultra da quai è il restauratur vegnì a la conclusiun ch'in fresco che valeva enfin ussa sco fresco simpel ed artisticamain modest, saja be ina skizza ch’il pictur n’ha betg pudì terminar. Las raschuns n’èn betg cleras. Ina ipotesa pussaivla è tenor Oskar Emmenegger che la pesta pudess avair interrut las lavurs vi dal maletg.
RR Actualitad 11:00