Resgia a Domat: Engaschi da la regenza è stà correct, però …

La regenza grischuna haja agì tenor sias cumpetenzas en connex cun la resgia gronda a Domat. A questa conclusiun vegn la cumissiun da gestiun dal Cussegl grond.

Areal a Domat. Bild in Lightbox öffnen.

Legenda da maletgs: La regenza ha agì a moda correcta pertutgant l'areal a Domat. Keystone

La regenza grischuna, il parsura dal Departament d’economia publica e fatgs socials dal Grischun Jon Domenic Parolini sco er l’Uffizi per economia e turissem hajan agì a moda correcta areguard la cumpra da la resgia gronda a Domat. Quai resulta dal rapport da la cumissiun da gestiun dal Cussegl grond.

Puncts dispitaivels

Las examinaziuns da la cumissiun sa fatschentan surtut cun dus puncts da critica:

  1. Èn ils custs da cumpra giustifitgads?
  2. Ha la regenza insumma gì las cumpetenzas da concluder tals contracts?

La cumissiun da gestiun dal Cussegl grond concluda ch’ils contrahents hajan negozià il pretsch da cumpra a tala moda. Dentant fa la cumissiun attent che mo pli il chantun portia ils ristgs finanzials suenter la cumpra. Perquai duaja il chantun far ina cunvegna supplementara cun la vischnanca da Domat en connex cun ils rendaquints, propon la cumissiun.

Tut en tut concluda la cumissiun che la regenza saja stada responsabla en chaussa. Quai sin basa da la lescha davart la promoziun dal svilup economic en il Grischun (GWE) ch’il Cussegl grond ha decis.

Critica da la cumissiun

La cumissiun crititgescha dentant che la communicaziun tranter las partidas involvidas saja stada manglusa. Damai ch’i n’haja dà nagin conclus da princip per la cumpra da l’areal, haja cunzunt l’Uffizi per economia e turissem stuì agir senza ina strategia formulada e prescripziuns.

Malgrà che blers han crititgà che l’engaschi da la regenza saja stà intransparent, concluda la cumissiun che la regenza haja tschiffà la schanza da realisar in areal d’industria a Domat.

RR novitads 06:00

Ina cronologia ...

Laschar ir video «L'areal da la resgia a Domat - Il nov "Silicon Valley"?»

L'areal da la resgia a Domat - Il nov "Silicon Valley"?

1:19 min, Nouvo RTR dals 19.5.2017