Las renfatschas èn pesantas. La firma Tscharner SA da Domat duai avair cugliunà ses collavuraturs. Sururas betg pajadas or, lavur da notg e fin d’emna betg pajada e rendaquints manipulads. Quai tut è vegnì or l’avrigl da l’onn passà. Dapi lura intercurescha la procura publica il cas. Er la cumissiun paritetica svizra, ch’è responsabla per ch’il contract da lavur collectiv da la branscha vegni tegnì en, ha prendì sut la marella la firma. Gia la fin dal 2015 èn la Tscharner e la cumissiun vegnidas perina, uschia Adrian Schneider, il president da la cumissiun vers RTR. La Tscharner sto pajar enavos als collavuraturs ina summa da sis cifras. Er ha ella stuì pajar a la cumissiun paritetica in chasti convenziunal – er qua ina summa da sis cifras. Pli precis n’ha Adrian Schneider betg vulì vegnir.
Firma duai vegnir reabilitada
Adrian Schneider è da l’avis che la Tscharner duai vegnir reabilitada. Ella stettia nà per ils sbagls ch’ella ha fatg e paja persuenter. Sche quels sajan capitads per sbagl u cun intenziun na saja betg decisiv. Per la cumissiun paritetica è il cas en quest senn serrà. Rico Tscharner, il mainagestiun dalla Tscharner SA, n’ha betg vulì prender posiziun vers RTR.
UNIA pretenda dapli
Tut auter guarda quai or tar la UNIA. Las pretensiuns ch'il sindicat UNIA fa en il rom da la procedura penala sajan bler pli autas che la summa ch’è vegnida pajada enavos als lavurers da la Tscharner, uschia Adrian Scarpetetti, l’advocat che represchenta ils lavurers. Quant auta precis n’ha el dentant anc betg savì dir. Tar la procura publica dal Grischun è il cas anc pendents. I saja in cas cumplitgà e quai dovria ses temp.
RR actualitad 07:00