Suenter la nova evaluaziun da la situaziun a Bondo pon ussa intgins dals radund 100 abitants turnar a chasa (zona verda). Ina segunda part po ir a chasa per intginas chaussas, sto dentant puspè bandunar la zona periclitada (zona blaua e cotschna). Sco Anna Giacometti, la presidenta communala da Bondo ha declerà na possian ils abitants da questas zonas anc per emnas betg returnar ad abitar en lur chasas. Ed ina terza part po ir oz be per rauba e damaun turnar a chasa (zona oranscha), dentant sin atgna responsabladad. Quels ston però esser capavels da bandunar lur dachasa en cas da privel aifer tschintg minutas. En cas da novas bovas vegnissan quests abitants puspè evacuads.
La notg è stada ruassaivla
Sco Roman Rüegg, il pledader da la polizia chantunala ha confermà envers la reportra da RTR Anna Caprez, saja la notg stada quieta a Bondo. I n’haja dà naginas novas bovas ord la Val Bondasca. Entant ha la tschertga da persunas sparidas puspè entschet.
Tschertga cuntinuescha – uss er cun chauns che chattan persunas mortas
Principalmain vegn tschertgà cun helicopters, tranter auter era cun in sistem che po localisar telefonins. La gievgia era er anc vegnì tschertgà cun in grond helicopter cun ina camera a chalur. Per che las equipas da salvament possian lavurar senza disturbis, ha il chantun prolungà la serrada dal spazi d'aria enfin glindesdi a mesanotg.
En lieus pli segirs en la Val Bondasca èsi er pussaivel da tschertgar cun chauns suenter fastizs da las persunas sparidas. Oz vegnia er tschertgà cun chauns che chattan persunas mortas, ha declerà Siffredo Negrini, il guid da muntogna che accumpogna ils manaders da chauns da tschertga. La tschertga saja difficila pervia dal terren da crappugl ed er privlusa.
Otg persunas sparidas
Sis persunas valan uffizialmain sco sparidas. Cun duas ulteriuras persunas na dettia nagin contact. Ina segunda gruppa ch'era da viadi en la regiun hajan ins entant chattà en l'Italia. Entant ha la Polizia chantunala precisà la derivanza da las sis persunas, ch'èn uffizialmain sparidas. Las persunas da la Germania derivan dal Bundesland Baden Württemberg, quellas da l'Austria da la Steiermark e las persunas svizras dal chantun Soloturn.
Futur intschert per guardiachamona
Reto Salis ha pudì observar e filmar la bova da Bondo davent da la chamona da Sciora. Dapi set onns maina el quella cun sia dunna. I haja schon adina puspè dà crudadas da crappa. Cun ina da tala dimensiun avess el dentant mai fatg quint. Per el e sia dunna sajan ils davos dis stads grevs. Cunzunt ils sparids sajan adina en lur patratgs. Quels èn numnadamain partì da lur tegia per far ina tura. Co i giaja vinavant cun il manaschi da chamona saja betg anc cler. Probablamain restia ella dentant serrada era proxima stad. Reto Salis e sia dunna returnassan però gugent sin la chamona da Sciora.
Suenter las 16:30 è ina segunda bova vegnida giu el vitg da Bondo. Dapli infurmaziuns tar quella chattais vus cun cliccar qua.
RR novitads 07:00