Siglir tar il cuntegn

Header

cuntegn

Valladas talianas Centro Tecnologico del Legno po cuntinuar

La regenza grischuna ha confermà ses sustegn empermess al center da cumpetenza per scrinaris a Poschiavo. Quai suenter che quel ha ademplì las cundiziuns e premissas ch’il chantun aveva fatg en connex cun il pajament da l’ultima transcha.

Grazia ad acziunaris dal Centro Tecnologico del Legno (CTL) ed il sustegn finanzial da sponsurs privats, hajan ins uss finalmain ensemen ils 500’000 francs ch’il plan da business prevesa, uschè Karl Heiz envers RTR.

Chantun dat 800'000 francs

Cun quai haja uss il chantun Grischun deliberà e pajà al CTL ils 800’000 francs ch’el aveva anc tegnì enavos. Ultra da quai aveva la regenza empermess in ulteriur import da 500’000 francs à fonds perdu per sustegnair il center durant la fasa da partenza fitg difficila.

Reclama sur ils cunfins

Sco quai ch’il president dal Cussegl administrativ ha declerà vinavant possia uss er vegnir fatg reclama en Italia per la purschida en la Valposchiavo. La persuna adattada saja gia pronta.

Il Centro Tecnologico del Legno aveva avert sia portas ils 2 d’october 2015 cun la finamira e visiun da generar novas plazzas da lavur en la val taliana. Tranter auter vul il Centro er scolar persunas che derivan da l’ester, surtut dal pajais cunfinant, l’Italia.

Artitgels legids il pli savens