Livigno vul reducir turissem da benzin cun taxa da via

Il president communal da Livigno, Damiano Bormolini, ha preschentà durant in’emissiun da la RSI la proposta d’introducir in dazi per autos che van sur il pass da la Forcola di Livigno per arrivar a Livigno. Ils Puschlavins èn però fitg sceptics da la proposta dals talians.

En viadi sur il pass da la Forcola di Livigno. Bild in Lightbox öffnen.

Legenda da maletgs: En viadi sur il pass da la Forcola di Livigno. RTR, S. Derungs

Tenor Damiano Bormolini fiss Livigno pront d’incassar ina taxa per tut ils vehichels sin territori talian che charreschan sin la via che collia il pass dal Bernina cun Livigno. Sco mesira da cumpensaziun pretendess Livigno dentant ch’il pass da la Forcola di Livigno restass avert durant l'entir onn, pia er l’enviern.

Poschiavo surpiglia rolla passiva

La proposta da Livigno n’ha betg procurà per gronda euforia en la Val Puschlav. Il president communal da Poschiavo, Alessandro Della Vedova è s'exprimì fitg sceptic davart la proposta da Bormolini. Ins na possia betg ignorar l’idea, mabain laschar tractar e sclerir las pussaivladads tranter l’Italia, il chantun Grischun e la Confederaziun, ch'ha la cumpetenza davart in pussaivel dazi.

Turissem da benzin tras la Valposchiavo

Il «traffic da benzin» durant la stad en direcziun Livigno è per la Val Puschlav in grond problem che chaschuna dapi in pèr onns chaus cotschens en val. Durant la stagiun auta han ins gia quintà fin 900 autos l’ura che passan il Puschlav en direcziun Livigno. Quai correspunda a 6’000 fin 7’000 autos che charreschan mintgadi tras la val.

Involver er ils Puschlavins

Per il cas ch’ins realisass ina taxa da via per il traject che maina a Livigno, duess la populaziun da la Valposchiavo decider en ina votaziun consultativa davart la proposta. Ultra da quai giavischass Alessandro Della Vedova ch’ins introduciss la taxa pir suenter in temp da prova. Sco ch’il president communal da Livigno ha declerà ad RTR, vul ins tschertgar il dialog cun la Regione Lombardia ed er cun il Chantun Grischun, quai las proximas emnas.

RR actualitad 17:00