Siglir tar il cuntegn

Header

cuntegn

Valladas talianas Turists pudessan guntgir la Bregaglia suenter las bovas

Singuls giasts che levan passentar lur vacanzas en Bregaglia han stornà quellas pervia da las bovas da Bondo. Cun consequenzas sin il turissem a lunga vista quinta l’organisaziun turistica Bregaglia dentant betg.

audio
Mezdi: Han las bovas en Bregaglia influenza sin il turissem?
ord Actualitad dals 28.08.2017.
laschar ir. Durada: 1 minuta 59 Secundas.

Ils biros d’infurmaziun da l’organisaziun da turissem Bregaglia hajan gì da respunder blers telefons ils davos dis. Cunzunt giasts che vulevan far vacanzas en Bregaglia levian savair co la situaziun vesia ora. Singuls hajan, tenor Michael Kirchner, maina fatschenta da l’organisaziun turistica da Bregaglia, suenter las duas bovas er stornà lur vacanzas.

Communitgar cleramain ils privels

Tuttina, cun consequenzas per il turissem a lunga vista quinta Michael Kirchner dentant betg. Cun ina communicaziun transparenta crai el ch’ils giasts turnian vinavant en Bregaglia. Ins stoppia uss communitgar cleramain ch’i dettia privels sulettamain en la Val Bondasca ed il rest da la vala saja segir. Plinavant stoppian ins era sensibilisar viandants ed alpinists co sa cumportar en las muntognas nua ch’i dettia mai ina segirtad absoluta.

Era nagins quitads per il turissem en la val fa la presidenta Anna Giacometti. I saja chapibel che persunas sajan quels dis pli precautas da vegnir en la Bregaglia. Ella è dentant persvadida che quai vegnia a sa calmar.

Chamonas da CAS restan serradas

In effect negativ sin il turissem han ils schabetgs a Bondo dentant per franc. Duas chamonas dal Club alpin svizzer en la regiun Val Bondasca ch’èn detg popularas tar viandants restan serradas ad interim. Uschia che quels giasts che visitan la chamona Sciora e la chamona Sasc Furä mancan segir questa stagiun e tut tenor era anc la proxima stagiun a la Val Bregaglia.

RR actualitad

Artitgels legids il pli savens