Igl ha dà temps ch'i na deva quasi nagins casturs en Svizra. En ils onns 1960 e 1970 èn quests animals puspè vegnids recolonisads. Il 2008 deva quai sulet in castur en l'Engiadina Bassa. Dapi lura è l'animal sa derasà en l'entir chantun. La gronda part viva en il conturn da Cuira. Là datti 12 reviers cun 43 animals. En il Rain Anteriur ha l'Uffizi da chatscha e pestga dumbrà 7 reviers cun 21 casturs. En il Rain Posteriur vivan 12 animals en 3 reviers. En l'Engiadina Bassa existan 5 reviers cun 15 animals ed en l'Engiadin'Ota 1 revier cun 2 casturs.
Tscherts casturs chaschunan problems
Sin il territori da la vischnanca da Trimmis dat quai problems pervia dal castur. El ha construì in rampar che retegna l'aua e staupa tscherts auals. Il privel: I pudess dar inundaziuns. Spustar la via da velos u auzar la punt saja memia char, di il vicepresident da Trimmis Nicola Stocker. Chattar schliaziuns n'è betg uschè simpel. Il castur e ses territori da viver è numnadamain protegì uschia ch'i n'è betg lubì da simplamain allontanar il rampar.
Igl è fitg difficil da chattar schliaziuns. Mintgatant avain nus il sentiment d'avair chattà ina soluziun – ma lura stuain nus constatar che nus essan al cunfin da quai ch'è legal.
La vischnanca ha dumandà l'Uffizi da chatscha e pestga per ina lubientscha da pudair allontanar il rampar. Il chantun è vi dad examinar la dumonda. «Sch'in rampar vegn allontanà construescha il castur in nov. Perquai è quai ina schliaziun be a curta vista», di Andrea Baumann da l'Uffizi da chatscha e pestga dal Grischun. El è persvas ch'il castur vegn a sa derasar anc pli fitg en il Grischun e ch'igl è da tschertgar soluziuns individualas per reviers problematics.
