L’iniziativa d’immigraziun da massa na metta be en privel ils contracts bilaterals cun l’UE, ma ella fa era fieu sut il tgil al Cussegl federal.
Il text d’iniziativa pretenda ch’ella vegnia realisada entaifer trais onns – sche quai n’è betg pussibel, lura duess l’iniziativa vegnir messa en vigur per ordinaziun.
Il Cussegl federal stat pia sut squitsch. Dus onns èn passads - in onn resta al Cussegl federal avant che la guillotina sa serra.
La clausula da protecziun
Il stan actual datescha dal december da l’onn passà: lura aveva infurmà il Cussegl federal, che l’iniziativa d’immigraziun da massa duai vegnir realisada a maun d’ina clausula da protecziun.
Quai vul dir: en l'avegnir duess vegnir definida ina cifra maximala da persunas che dastgan immigrar mintg'onn en Svizra.
Sche questa cifra maximala vegniss cuntanschida, lura vegnissan introducids contingents per l’onn che suonda.
Il stan dals discurs cun l’UE
Il Cussegl federal ha communitgà cleramain il december passà: Sche l’UE n’è betg d'accord cun la clausula da protecziun, lura tira la Svizra tras quest plan suletta, senza l'ok da l’UE.
I dat bain discurs consultativs cun Brüssel – che l’UE accepta però ina tala clausula da protecziun è pauc probabel.
Il pretsch ch'i fiss da pajar per quest plan B pudess esser, che l’UE blochescha las cunvegnas bilateralas cun la Svizra.
Il proxim mars preschenta il Cussegl federal il project da la lescha.