L'onn passà han ospitals svizzers tractà stgars 1’400 uffants pervi da maltractaments supponids u segirs. Questa cifra è cun quai restada stabila e quai sin in aut nivel. In uffant pitschen è mort pervi da las consequenzas da maltractament. Tge che dat en l'egl è il dumber dals delinquents giuvenils ch'è s'augmentà fermamain.
Adina dapli giuvenils èn delinquents
En bunamain mintga quart cas da maltractament d'uffants era il delinquent sut 18 onns. Quai mussa la statistica naziunala davart la protecziun dals uffants dal 2015. L’abus sexual tras delinquents giuvenils è gia enconuschent pli ditg. Areguard l’abus corporal e psichic saja il trend dentant «surprendent e nov».
Babs u mammas èn savens delinquents
Il maltractament psichic è cun 30% la furma da maltractament la pli frequenta che clinicas d'uffants han registrà.
Plinavant succedan tenor la statistica ils blers cas d’abus psichic e corporal aifer la famiglia. Er bunamain mintga segund abus sexual vegn commess d’in commember da la famiglia.
RR novitads 14:00