Bun onn da fatschenta per l'SBB

Il resultat dal concern è creschì ed il traffic da rauba è puspè vid far gudogn. Passagiers ha la Viafier federala gì tants sco anc mai. 1,25 milliuns persunas èn viagiads cun l'SBB il 2016. En las cifras cotschnas sa chatta il champ da l'infrastructura.

Purtret dal logo da l'SBB. Bild in Lightbox öffnen.

Legenda da maletgs: L'SBB è cuntenta cun l'onn da fatschenta 2016. Keystone

La viafier federala ha transportà uschè blers passagiers sco anc mai. Uschia nizzegian mintga di 1,25 milliuns passagiers las viafiers federalas quai uschè blers sco anc mai. Era è il gudogn dal concern creschì il 2016 per 135 milliuns francs, sin 381 milliuns. Il gudogn resulta però surtut da la vendita d’immobiglias e d’effects extraordinaris, communitgescha l’SBB. Era il traffic da rauba ha puspè nudà in gudogn, perencunter noda la sparta da l’infrastructura cifras cotschnas.

Traffic da rauba fa gudogn

Fertant ch'il traffic da rauba ha l'onn avant anc fatg ina perdita da 22 milliuns francs, è il 2016 anc restà in resultat dad 1 milliun francs. Quai schebain che la situaziun economica saja anc adina greva.

L'infrastructura dentant scriva cifras anc pli cotschnas. 103 milliuns perdita ha il champ commerzial fatg l'onn passà e cun quai anc ina giada 7 milliuns dapli che l'onn avant. Or da quest motiv vul l'SBB far enavant cun ses program da spargn «RailFit20/30». Enfin l'onn 2020 duain 1'400 plazzas vegnir stritgadas e 1,2 milliardas vegnir spargnadas. Ma er 200 novas plazzas duain vegnir stgaffidas en ils secturs dal nettegiament e tar il persunal da tren. Relaschadas duai dar paucas.

Critica dals passagiers

La relaziun dal pretsch e da la prestaziun è dentant vegnì crititgada fermamain dals passagiers da l'SBB. Quai mussia ch'i fetschia senn per l'SBB da vinavant sa metter en per pretschs almain stabils, scriva il concern.

Pli cuntents èn ils passagiers areguard nettezza e plaz. Er pertutgant punctualitad è l'SBB en l'Europa exemplarica. 88,8% dals passagiers sajan arrivads punctualmain. Quai saja 1% dapli ch'il 2015 ed il pli aut dumber dapi tschintg onns.

RR novitads 11:00