Siglir tar il cuntegn

Header

cuntegn

Svizra Center naziunal da sport da naiv – 1 u 3 è la dumonda

Suenter ch'il Cussegl naziunal ha ditg gea a la moziun dal cusseglier naziunal cristiandemocrat Christian Lohr da la Turgovia, ha il Cussegl dals chantuns discutà la proposta il glindesdi.

La moziun vegn dentant ad avair grev. La cumissiun per scienza, educaziun e cultura ha decidì da renviar ella, e quai unanimamain.

audio
Saira: In center naziunal da sport da naiv u forsa plirs – il Cussegl naziunal ha discutà
ord Actualitad dals 07.03.2016.
laschar ir. Durada: 2 minutas 34 Secundas.

Per il sport popular e betg per l’elita

In center naziunal da sport da naiv stoppia en emprima lingia promover il sport popular e betg il sport d'elita, di il Cusseglier naziunal Christian Lohr en sia moziun. Ed el è persvas che quai n’è betg pussaivel cun mo in center a Lai.

Dapi l'atun passà èsi enconuschent ch'il Cussegl federal preferiss da construir in center naziunal da sport da naiv a Lai. Anc n’è la decisiun finala per il project dentant betg crudada, quai era per raschuns finanzialas.

Profit per pliras regiuns

Per Christian Lohr èsi impurtant da reparter l'offerta sin pliras regiuns enstagl da centralisar tut a Lai. «Jau hai survegnì reacziuns da tut las regiuns da la Svizra che m’han persvadì ch’ins na veglia betg in project centralisà. Pliras scolas, pliras uniuns ed era pliras famiglias duain pudair nizzegiar las offertas.»

Stefan Engler avertescha

Da sustegnair e promover il sport popular saja era ses giavisch, respunda il cusseglier dals chantuns grischun Stefan Engler. E quai saja era l'intenziun dal center a Lai. Da bittar uss sutsura il project dal Cussegl federal fissi dentant privlus. «Il ristg ch’i na dat a la fin nagins da quels centers è pli grond, che da suandar la proposta dal Cussegl federal da crear in da quels centers en Svizra. Sco ils centers naziunals da sport da stad a Tenero u a Magglingen dessi lura in tal center naziunal per il sport da naiv a Lai.»

Ristg d'avair nagut la finala

Ils centers da sport da stad hajan mussà ch'els possian promover il sport en la populaziun. Tar in center naziunal da sport da naiv a Lai vegni quai ad esser medem, è Engler persvadì. I na fetschia perquai nagin senn da reparter las resursas sin plirs lieus. I saja plitost l’emprova da reparter ils centers da sport sur l’entira Svizra e da cuntanscher uschia dapli acceptanza. El saja dentant persvas che quai mainia plitost al ristg ch’i vegnia decidi da laschar da la vart il project d’in center naziunal da sport da naiv.

Pitschna schanza per in gea

Quella tema partan era ils commembers da la cumissiun per scienza, educaziun e cultura dal Cussegl dals chantuns, els han decidì unanimamain da refusar la moziun. Il glindesdi n’è la decisiun anc betg crudada. Fitg probabel èsi dentant ch’il Cussegl dals chantuns suonda sia cumissiun, e di na a 3 ni dapli centers naziunals da sport da naiv.

Artitgels legids il pli savens