Siglir tar il cuntegn

Header

cuntegn

Svizra Chantuns serran alloschis per fugitivs

En Svizra vegnan tschentadas pli paucas dumondas d'asil. Uschia èn numerus alloschis chantunals per fugitivs danvanz. Per l'onn 2017 quinta il secretariat da stadi (SEM) cun radund 24'500 dumondas d'asil.

Che la Svizra haja pli paucas dumondas d'asil valia dentant be uschè ditg fin che la cunvegna tranter l'UE e la Tirchia saja anc en vigur. Quai scriva il secretari dal stadi Mario Gattiker la fin schaner en ina brev als directurs da giustia chantunals. En cas d'ina desditga possia il dumber puspè s'auzar sin dapli che 32'000 dumondas d'asil en Svizra.

Ord quai motiv na vul la Confederaziun betg adattar ils puncts principals per ina planisaziun per il cas d'urgenza d'asil. Tar quest plan tutga la registraziun, la controlla da segirezza, l'alloschament e la tgira dals requirents d'asil. Ils process stoppian era esser garantids sch'i avess da dar svilups nunspetgads, uschia il SEM.

Chantuns serran alloschis

En ils chantuns ha la digren da dumondas d'asil dentant per consequenza ch'els serran intgins alloschis ch'èn sutoccupads u che n'èn betg pli en funcziun. Intgins da quests alloschis èn gia dapi la primavaira 2016 serrads. Turitg ha gia il matg 2016 annunzià ch'els serrian ils alloschis a Turitg-Witikon e Turitg-Altstetten. Ils dus centers en implants da protecziun civila eran vegnds averts il november e december 2015 cura che las dumondas d'asil eran idas ensi marcantamain.

Basilea-Citad ha serrà l'alloschi en l'implant da la protecziun civila a St. Jakob la fin november. La situaziun saja sa calmada uschia che tuttas persunas pon vegnir messas sut tetg en bains immobigliars da l'agid social. Uschia na stoppian nagins requirents d'asil pli star sut terra. Ma l'alloschi sappia en cas d'urgenza vegnir averts entaifer in mais puspè.

RR novitads 11:00

Artitgels legids il pli savens