La citad da Turitg na sa participeschia betg a gieus olimpics en il Grischun, uschia il messadi dal parlament da la citad da 125 chaus. La ristga finanziala saja bler memia gronda. Plinavant na sajan gieus olimpics ni persistents ni economics.
Sceptica fundamentala
Perfin la partida populara è cunter la candidatura. Il project saja instradà mal, uschia la PPS da la citad da Turitg. En il Grischun dettia quai memia pauc spazi, memia paucs indrizs da sport e memia paucs daners. I na sappia betg esser ch'il chau ed il cor dals gieus saja a San Murezzan e la bursa a Turitg. In zic main cler è s'exprimida la PLD. Actualmain sappian ins simplamain memia pauc. La partida parta però la sceptica da la regenza da la citad.
«Ina pitschna participaziun» fiss pussaivla
Turitg na vul betg esser ina host-city, construir nagins implants da sport ed er betg purtar deficits. Igl è però anc adina pussaivel ch'il stadion dal Letzigrund, il Hallenstadion u il Secheläutenplatz vegnan mess a disposiziun per ina «indemnisaziun».
Spetgar giu la votaziun
Il cusseglier guvernativ grischun Jon Domenic Parolini ha ditg envers la gasetta «Südostschweiz» che quai saja ina decisiun dal parlament da la citad, la partenaria saja però la regenza da la citad da Turitg. Ins vegnia a spetgar giu la votaziun dal suveran grischun ils 12 da favrer. Dettia quai in «gea» vegnian ins danovamain a tschertgar il contact cun la citad. Pir lura vegnia a sa mussar, sche autras partidas pussaivlas vegnian en il focus.
Avant era la conferenza da las regenzas dals chantuns da la Svizra orientala s'exprimida per ils plans olimpics.
RR novitads 22.00