La BLS vuless charrar da Brig ed Interlaken sur Aarau a la plazza aviatica Turitg sco er dad Interlaken a Basilea. Actualmain ha la SBB il monopol sin las lingias dal traffic a gronda distanza.
Tenor Rudolf Stämpfli, il president dal cussegl administrativ da la BLS, na vesia la BLS la SBB dentant betg sco concurrenta, ma sco partenaria:
Nus vivain ensemen bain.
Che la BLS s'interessescha per singulas lingias ha ella gia dà dad encleger pli baud. Las trais lingias ch’ella ha en mira èn lingias che fan gudogna. La BLS spera, che da manar quellas las gidass da pajar sias lingias deficitaras en sia rait regiunala.
Las lingias da gronda distanza vegnan reorganisadas la fin da l'onn
Il mument ha la SBB il monopol sin las lingias da gronda distanza. Las duas viafiers privatas BLS ed SOB vulan dentant manar sez tschertas lingias. La fin da quest onn vegnan las concessiuns per il traffic sin binaris puspè repartidas da nov. Ils discurs cun la SBB han dentant fatg naufragi.
RR novitads 11:00
