Bunamain 2'000 persunas han plaz en il center da cultura e congress (KKL) a Lucerna. Passa 1'000 èn stadas la dumengia al concert da benefizi dad incantanti, l'esemble cantus firmus ed il Chor viril Ligia Grischa.
Ils chors han rimnà daners cunter la malaria, mintga bigliet ha custà 50 francs uschia che passa 50'000 francs èn vegnids ensemen per il cumbat encunter la malsogna derasada cunzunt en Africa. Ils daners van a la fundaziun «Against malaria foundation». Quai è ina fundaziun che reparta tranter auter raits da mosquito, l'animal che derasa la malaria.
Fundaziun transparenta e perquai degna da vegnir resguardada
Ins haja tschernì questa fundaziun per perquai ch'ella saja transparenta ed haja fitg bass custs administrativs. Perquai cuntanschian er uschè blers daners sco pussaivel il lieu, nua ch'els vegnian duvrads, uschia Christoph Cajöri, in dals iniziants ed il dirigent da la Ligia Grischa.
Da dar ils daners saja dentant be pussaivel grazia a la fundaziun Lamprecht-Steiger, ina fundaziun che s'engascha per chors svizzers. Quella surprenda numnadamain tut ils custs dal concert e quels muntian a radund 80'000 francs.
Moderà il concert ha l'anteriura cussegliera federala Eveline Widmer-Schlumpf.
RR actualitad 07:00