Ils emprims sis mais han 14,6 milliuns tonnas rauba traversà il Gottard ed il Simplon sin ils binaris. Quai èn 200'000 tonnas u 1,5% damain ch’il prim semester da l’onn passà, communitgescha l’uffizi federal per il traffic.
Squitsch da concurrenza
La cumpart da la viafier sin l’entir traffic che traversa las Alps è uschia sa reducì da 71,2 sin 70,9%. Tenor l’uffizi federal è quai l’emprima giada dapi il 2013 ch’il traffic sin ils binaris è sa reducì. La raschun saja dasper il squitsch da concurrenza er la gronda activitad da construcziun.
7000 camiuns da vitgira damain
Er sin la via è il traffic da vitgira sa reducì ils emprims 6 mais da l’onn. Il dumber dals camiuns ch’han traversà las Alps è sa reducì sin 489'000. Cumpareglià cun la medema perioda da l’onn passà èn uschia charrads 7000 camiuns damain (-1,5%) tras las Alps.
RR novitads 18:00