- Il Cussegl federal vul remplazzar la vignetta da tatgar cun ina vignetta digitala, l’uschenumnada e-vignetta.
- Il pretsch da questa taxa da via duai er vinavant muntar a 40 francs.
- Vignettas cun ina valaivladad da damain ch’in onn ha la regenza refusà.
Nagina vignetta, mabain permiss electronic
La nova vignetta na fiss atgnamain betg pli ina dretga vignetta, mabain in permiss electronic registrà. Quest permiss pudess vegnir cumprà via internet e fiss registrà suenter il pajament. Tenor il rapport vegnissan las vignettas controlladas tras cumparegliaziun dals numers d’autos per video.
Ils avantatgs da l’e-vignetta èn per il Cussegl federal la flexibilitad da la tariffa e la scumpartiziun. Vi dal pretsch na duai sa midar nagut. In augment da la taxa aveva il 2013 fatg naufragi a l’urna. Per motos e chars annex ponderescha il Cussegl federal percunter da sbassar il pretsch.
Introducziun il pli baud il 2023
Per l'introducziun da l'e-vignetta quinta il Cussegl federal cun custs tranter 50 e 75 milliuns francs. Mintg'onn custass il model lura tranter 25 e 35 milliuns francs. Oz muntan ils custs a 48 milliuns francs per onn.
Fin ch'ina decisiun dal pievel pudess quai anc ir dus onns, il temp d'introducziun cuzass quatter onns. Ina midada dal sistem fiss uschia pussaivla a partir dal 2023.
RR novitads 18:00