Siglir tar il cuntegn

Header

cuntegn

Svizra Dal protocol da la Croazia enfin a l’iniziativa da reparaziun

A Berna ha cumenzà la sessiun extraordinaria dal Cussegl naziunal. Ella cuzza mo trais dis. En il center èn la planisaziun da la legislatura dal Cussegl federal, la cunvegna da libra circulaziun extendida sin la Croazia e l’iniziativa dal pievel per la reparaziun.

Gia l’emprima fatschenta che vegn tractada cuntegn avunda potenzial per dispitas e debattas animadas. I va per la planisaziun da la legislatura dal Cussegl federal per ils onns 2015 enfin 2019. Quai è l'agenda politica dal Cussegl federal nua ch'el fixescha sias finamiras.

Il Cussegl naziunal durant la sessiun da primavaira.
Legenda: Il Cussegl naziunal durant la sessiun da primavaira. Keystone

E sch'i va tenor la cumissiun preparatorica duai la regenza metter in pau autras finamiras che planisà.

Spargnar

I duai per exempel vegnir spargnà dapli che gia previs, i duai dar pli paucas leschas e regulaziuns per l'economia, tar l'AVS duai vegnir stgaffì in mecanissem che auza automaticamain la vegliadetgna da pensiun sch'il fond da l'AVS croda sut in tschert nivel, e l'agid per ils pajais en svilup duai vegnir reducis sin la mesadad.

La debatta dad oz e damaun vegn a mussar sche la maioritad da la PPS e da la PLD, che las duas partidas han dapi las davosas elecziuns en il Cussegl naziunal, sche quella maioritad vegn a pudair far passar sias posiziuns.

Circular

Ina debatta intensiva vegni era a dar tar la cunvegna da libra circulaziun che duai vegnir extendida sin la Croazia. Tenor il Cussegl federal ed ina maioritad da la cumissiun è quai in pass impurtant per che la Svizra possia puspè sa participar cumplainamain al program da perscrutaziun Horizon 2020.

Ils adversaris vesan en l'extensiun sin la Croazia dentant ina violaziun da la constituziun. Lezza scumonda dapi il gea a l'iniziativa cunter l'immigraziun da massa cunvegnas che na lubeschan betg a la Svizra da regular sezza l'immigraziun.

Reparar

E lura vegn era debattà davart l'iniziativa da reparaziun. In chapitel plitost stgir da la pli giuvna istorgia Svizra.

Enfin en ils onns 80 dal tschientaner passà han las autoritads prendì davent uffants, han mess els en autras famiglias nua ch'els èn per part vegni malduvrads sco gidanters favuraivels. Auters èn vegni serrads davent en praschuns mo perquai ch'els na sa depurtavan betg confurm a la maioritad. Oz vivan anc da quai da 20'000 unfrendas da quellas mesiras.

Sper la perscrutaziun scientifica e la confruntaziun da la societad cun quest chapitel stgir da l'istorgia Svizra pretenda l'iniziativa era ch’i vegnia stgaffì in fond cun 500 milliuns francs che duai gidar unfrendas che han patì fitg da las mesiras repressivas.

Il Cussegl federal renconuscha bain ils malfatgs, el vul dentant mo crear in fond da 300 milliuns francs. Igl è indecis ch'ils iniziants pudessan esser cuntents cun la proposta dal Cussegl federal e retrair l'iniziativa sche la cuntraproposta vegn approvada dal parlament.

Artitgels legids il pli savens