La chadaina electronica (en noziun tecnica in «emettur da monitoring electronic») pussibilitescha da localisar ses purtader. Ella duess gidar a cumprovar sch'il stalker sa tegna vi dals scumonds da s’approximar u da contactar lur unfrendas.
Sommaruga: «Nagina lescha n'è perfetga»
Quest intent ha publitgà Simonetta Sommaruga il venderdi ad ina dieta tar «25 onns lescha per agid d’unfrendas». La lescha haja bain sa cumprovada, però nagina lescha saja perfetga. Quai ha ditg la cussegliera federala avant radund 250 politichers, experts e represchentants d'organisaziuns d'agid.
Nus na guardain betg be enavos sin 25 onns pratica, ma nus guardain, tge che nus savain far meglier en ils proxims 25 onns.
Perquai vegn ella a dumandar il Cussegl federal en las proximas emnas per novs instruments a favur dad ina meglra protecziun cunter violenza, citescha l’agentura da novitads svizra SDA la cussegliera federala tenor il text dal discurs.
25 onns lescha per la protecziun d'unfrendas
La lescha per la protecziun dad unfrendas datti dapi 25 onns. Ella pussibilitescha ad unfrendas dad acts criminals da pretender agid medizinal, psicologic u giuridic e da survegnir prestaziuns finanzialas. Tut questas prestaziuns stan a disposiziun er als confamigliars.
L’onn 2016 èn vegnids pajads 6,3 milliuns francs ad unfrendas dad acts criminals. Durant il medem temp han ils centers dad agid per unfrendas purschì maun en 35’189 cussegliaziuns.
Dapli tar «stalking»
RR novitads 15:00