La muntada da siemis è fitg individuala. La notg siemia noss tscharvè per vegnir a frida cun nossas regurdientschas. I dat dentant siemis che capitan savens e che blers umans enconuschan era da sasez. Per exempel siemian bleras persunas savens da pudair sgular. Sgular po sa sentir bel ed è per il solit collià cun bels sentiments.
I dat dentant era siemis che na sa sentan betg uschè bels sco sgular. In exempel è sch'ins siemia che tut ils dents crodan ora. Sch’ins perda en in siemi ils dents, po quai avair pliras significaziuns. I po esser ch’ins sa senta malsegir e ch’i na va betg bain cun ins.
Ina muntada sumeglianta hai, sch'ins sto tuttenina scriver in examen. Sch'ins siemia ch'ins stoppia scriver in test nunpreparà e n'haja betg emprendì. Quest siemi po signifitgar ch'ins senta bler stress en la vita reala. Ultra da quai sa sentan ins probablamain nunpreparà per insatge che sa chatta en il futur. Per il solit munta quest siemi era ch'ins ha tema da disdir.
In auter siemi che po pertutgar dunnas ed umens è il siemi ch'ins è en speranza. Esser en speranza en in siemi po signifitgar ch'ins senta speranza en la vita reala. Per rumantsch din ins perfin «esser en speranza» sch'ins spetga in uffant. Forsa spetg'ins lura en la vaira vita insatge, ma betg gist in uffant.
I dat bleras, fitg bleras differentas interpretaziuns da siemis. I dat era differents simbols ch'i po dar en siemis, per exempel filunzas e ratuns ed uras e cudeschs e bler auter.
Savair, tge che noss siemis muntan, na po nagin propi.
