Emissiun naziunala 1. d'avust - Berna – chapitala da la Svizra - Novitads

Las moderaturas ed ils moderaturs da las quatter regiuns linguisticas, Corina Schmed (RTR), Sven Epiney (SRF), Sandy Altermatt (RSI) e Jean-Marc Richard (RTS) scuvran en differentas reportaschas ils secrets da la citad e vegnan uschia er en lieus che strusch ils indigens enconuschan.

Berna è probabel ina da las chapitalas las pli patgificas dal mund: Nua auter pon ins flanar sut arcadas, far bogn en il flum cun vista sin il bajetg dal parlament u giudair la vita en ustarias da curtin cumadaivlas? Berna ha però er da porscher bler dasper tut ils clischés.

A la tschertga da perlas e stgazis zuppads

Las moderaturas ed ils moderaturs da tut las quatter parts linguisticas da la Svizra van perquai a la tschertga da stgazis e perlas zuppadas. Nossa moderatura Corina Schmed ha tranter auter pudì guardar ensemen cun Sven Epiney davos la culissas da la Chasa federala – nua ch'igl ha dà ina u l'autra surpraisa.

video

Corina en Chasa federala

Or da Actualitad dals 31.07.2023.

laschar ir. Durada: 13 minutas 30 Secundas.

Ensemen cun l'inspectur chantunal per aua da baiver e da far bogn – l'Engiadinais Rudolf Robbi – ha Corina er pudì scuvrir las profunditads da Berna – en las «gassas sutterranas» nua che strusch ina turista u in turist vegn.

video

Berna «Underground»

Or da Actualitad dals 31.07.2023.

laschar ir. Durada: 5 minutas 33 Secundas.

E schon bunamain tradiziunalmain ha era spetgà ina challenge sportiva sin Corina. Il current da l'Aara che curra tras la citad na pon ins betg mo duvrar per laschar trair dal flum giu, mabain er per far surfing. Pli precis: Bungee surfing. Il support ha Corina survegnì dal rumantsch Andri Bisaz, che presidiescha il club academic svizzer da far surfing.