Siglir tar il cuntegn

Header

cuntegn

Svizra En media 6’189 francs al mais han ils Svizzers gudagnà il 2014

6’189 francs brut al mais: uschè auta è la paja media d’ina plazza cumplaina en l’economia publica stada il 2014. Tranter il 2012 ed il 2014 èn las pajas en Svizra creschidas per 1,2%. La differenza tranter la pli bassa e la pli auta paja è sa sminuida, scriva l’Uffizi federal da statistica.

La media da las pajas en Svizra è creschida ils onns 2012 fin 2014 cun in plus da 1,2% pli pauc ch’anc la perioda avant (2010 fin 2012: +3,2%). Ils 10% dals lavurants cun la paja la pli bassa han gudagnà pli pauc che 4’178 francs al mais. Ils 10% dals lavurants cun la meglra paja han dentant gudagnà passa 10’935 francs al mais.

Legenda:
Media da las pajas tenor las regiuns (2014) Uffizi federal da statistica

Grondas differenzas tranter las branschas

Sco quai che la retschertga da structura da paja da l’Uffizi federal da statistica mussa, èn las differenzas tranter las branschas dentant fitg grondas. Cler sur la paja media èn ils salaris da las branschas cun in’auta valurisaziun sco «assicuranzas» (8’769 francs), «perscrutaziun e svilup» (9’004 francs), «prestaziuns finanzialas» (9’549 francs) e «l’industria da farma» (9’694 francs).

A la cua da la scala da salari èn las branschas «producziun da mangiativas e pavel» (5’303 francs), «commerzi en detagl» (4’761 francs), «restauraziun/hotellaria e gastronomia» (4’333 francs) e «servetschs persunals» (3’910 francs).

Differenzas tranter las pajas sa sminueschan

Tranter ils onns 2008 e 2014 è la differenza tranter la paja la pli auta e la paja la pli bassa è sa sminuida: e quai dal factur 2,8 sin 2,6. En il medem mument èn ils salaris da quels 10% ch’èn il meglier pajads en Svizra creschids per 3,6%. Las pajas da quels 10% che gudognan il pli pauc en Svizra, èn s’augmentadas perencunter per 9,1%.

Dunnas gudognan vinavant pli pauc

En il sectur privat è la differenza da paja tranter dunnas ed umens vinavant gronda cun 15,1%. Ella è dentant sa sminuida ils ultims onns: il 2012 era la differenza da pajas tranter umens e dunnas anc 18,9%. Questa differenza da paja tranter um e dunna sa laschia declerar tenor l’Uffizi federal da statistica tranter auter cun caracteristicas structurals sco per exempel vegliadetgna, onns da lavur u nivel da responsabladad.

Legenda:
Differenza da la paja tranter um e dunna (2014) Uffizi federal da statistica

Boni n’èn betg pli uschè impurtants

L’onn passà han damain persunas survegnì in bonus. Il 2012 eran quai anc 36,1%, il 2014 han be pli 35,1% dals lavurants survegnì in bonus. Era la media dals boni è sa sminuida numnadamain da 13’075 francs il 2008 sin 8’347 francs il 2014.

Dentant era qua variescha l’autezza dals boni tenor branscha e nivel da responsabladad. En il cader pli aut per exempel èn ils boni en il sectur da producziun da mangiativas e pavel en media 14’172 francs, en la branscha d’energia 20’381 francs, en la branscha da la producziun chemica 34’466 francs, ils bonis en la branscha da l’administraziun e cussegliaziun d’interpresas van en media fin a 62’937 francs e tar las assicuranzas schizunt fin a 75’525 francs.

Persunas senza ina posiziun da manar han era survegnì l’onn passà boni, dentant eran quels cun ina media da 3’699 francs in ton pli pitschens.

RR novitads 12:00

Artitgels legids il pli savens