En sasez era il program per il Museum naziunal a Turitg già finì. Dentant la directura Denise Tonella ha vis la projecziun da multimedia da Liliana Heimberg e ses team, ed ha decidì che quella sto avair plaz en il museum. Per la manadra artistica da l’omagi a las dunnas, Liliana Heimberg, ina onur.
Ch'il Museum naziunal ha decidì d’exponer è in mument incredibel. Betg mo per nus ch'avain fatg la projecziun, mabain per las dunnas – ch'ellas vegnan vesidas e percepidas.
L'onn 2021 cura ch’il giubileum da 50 onns dretgs da vuschar da las dunas è stà – è la projecziun vegnida mussada per in’emna vi da la Chasa federala e la Banca naziunala svizra. Il pli difficil è stà da chattar las infurmaziuns per far la projecziun, di Heimberg. L’istorgia da las dunnas saja documentada mal en Svizra, in punct che la manadra artistica crititgescha fermamain.
Era oz n’è l’istorgia da las dunnas preschenta en ils cudeschs d’istorgia. Per il pli vegn quella menziunada be sin 2 u 3 paginas e basta. Quai sto sa midar.
L’istorgia da las dunnas svizras n’è anc lunsch betg raquintada a fin, agiunta Heimberg. Era betg cun la projecziun. 20 minutas na possian betg raquintar in cumbat da 150 onns. La projecziun è da vesair enfin ils 16 d'avrigl en il Museum naziunal.
