El haja gia percurschì baud signals positivs per l'iniziativa che vul ina 13avla renta, quai di il cusseglier naziunal da la PPS Roman Hug. En sia vischnanca Trimmis saja quai adina puspè stà d'udir. La populaziun vesia ch'i dettia daners per bler, ussa veglian er ellas ed els profitar.
Ch'il sustegn saja uschè grond n'avess il cusseglier naziunal socialdemocratic Jon Pult betg pensà. Quai mussia che l'iniziativa saja il dretg instrument per curreger las perditas en la segunda pitga.
Cusseglier naziunal Martin Candinas da l'Allianza dal Center è pli pauc intgantà dal verdict dal suveran e di ch'ils adversaris hajan sutstimà l'iniziativa ed avessan stuì far ina cuntraproposta en il parlament per far insatge cunter las rentas bassas.
Co finanziar la 13avla renta?
Finanziar ina 13avla renta da l'AVS per adina dapli persunas che van en pensiun è ina sfida ed il text d'iniziativa lascha anc avert co che questa finanziaziun duai vesair or. Ils trais parlamentaris han dentant ideas co quai pudess ir:
Il med il pli gist fiss da finanziar ina gronda part da la 13avla sur contribuziuns sin las pajas.
Per Martin Candinas datti betg be ina moda co pajar la 13avla renta, el è persvadì ch'i dovra ina maschaida. Uschia vesa el contribuziuns pli autas sin pajas ed era in augment da la taglia sin plivalur. La discussiun na dastgia dentant betg sa reducir sin questas variantas.
Nus stuain vegnir a dapli entradas – saja quai cun auzar taglias u er introducir novas taglias, p.ex. sin transacziuns da banca.
Cunter questas ideas è Roman Hug - cun dapli taglias e taxas vegnia franada vinavant la capacitad da cumpra.
Igl è da serrar pli fitg la tschinta e franar tscherts projects a favur da nossa populaziun.
Potenzial da spargn vesan Hug e sia Partida populara tar ils daners che van a favur da pajais en svilup, las expensas d'asil ubain er il sustegn per famiglias ch'èn fugidas da l'Ucraina en Svizra.
