Siglir tar il cuntegn

Header

cuntegn

Svizra Iniziativa per il repatriament effectiv - pro e contra

In’emprim’iniziativa dal pievel da la PPS per il repatriament d'esters criminals ha il suveran gì acceptà il november 2010. L’iniziativa ha dà tschintg onns temp al parlament da realisar ina lescha.

Quai temp da tschintg onns han las duas chombras dal parlament respectà ed il mars da l’onn passà han ellas approvà ina lescha correspundenta che va en vigur, sche l’iniziativa na vegn betg acceptada ils 28 da favrer.

audio
Mezdi: Repatriament effectiv - per tge vai?
ord Actualitad dals 08.02.2016.
laschar ir. Durada: 6 minutas 4 Secundas.

Il parlament n'ha betg fatg enavant

Dentant, gia il 2012 ha la PPS inoltrà ina segund’iniziativa per il repatriament d’esters. Quai cun l’argument, ch’il parlament na fetschia betg enavant cun la realisaziun da l’emprim’iniziativa e che la lescha na resguardia betg la voluntad dal suveran.

Quell’iniziativa è formulada sco ina lescha ed enumerescha a moda detagliada, tge delicts che mainan al repatriament automatic. Ultra da quai sclauda ella facticamain il principi da commensurabladad.

Repatriament pervi da bagatellas

Tenor ils adversaris metta l’iniziativa uschia en dumonda noss sistem democratic e violescha principis impurtants da noss stadi da dretg. En in tal stadi formuleschia il parlament las leschas e las dretgiras possian examinar mintga cas per sasez e resguardar il principi da la commensurabladad. Era delicts marginals, uschenumnadas bagatellas, possian manar ad in repatriament.

Uschia èsi pussaivel ch’in Talian ch’è naschì en Svizra vegn repatrià, perquai ch’el ha survegnì avant onns in chasti perquai ch’el è charrà memia spert ed è stà involvì ina saira en ina baruffa. Omadus sajan cas per ils quals in delinquent svizzer na stoppia betg temair in chasti draconic.

Plinavant haja il parlament pinà ina lescha severa che possia ir en vigur immediat suenter in na a l’iniziativa da la PPS.

Artitgels legids il pli savens