Siglir tar il cuntegn

Header

cuntegn

Svizra Konrad Langhart è nov president da PPS Turitg

La PPS dal chantun da Turitg ha elegì in nov president. L’elecziun è stada stretga ed ha duvrà dus scrutinis. La finala ha Konrad Langhart survegnì las bleras vuschs e presidiescha uschia da nov la partida chantunala.

Il nov president da la Partida populara dal chantun Turitg sa numna Konrad Langhart.

Battì il concurrent Zanetti

Il pur da 52 onns è vegnì elegì a la radunanza da delegads ed ha fatg la cursa cunter il cusseglier naziunal Claudio Zanetti. Langhart ha survegnì 224 vuschs, Zanetti 174. Nagina schanza ha gì il candidat Hans-Peter Amrein. El era sa retratg suenter l’emprim scrutini.

Konrad Langhard sesa dapi il 2011 en il parlament dal chantun Turitg e fa part da la suprastanza da l'uniun purila chantunala.

Cleras finamiras

Sco president da la PPS Turitg vul Langhart s'engaschar per las interpresas pitschnas e mesaunas. Ed il nov parsura ha cleras finamiras per l'avegnir da sia partida.

La finamira: Suenter las elecziuns dal 2023 duai la partida chantunala avair 60 deputads, trais cussegliers guvernativs e 14 cussegliers naziunals. Plinavant duai la partida turitgaisa reconquistar il sez en il cussegl dals chantuns.

RR novitads 06:00

Artitgels legids il pli savens