Siglir tar il cuntegn

Header

cuntegn

Svizra La nova da 20 è qua!

La Banca naziunala svizra ha preschentà la nova bancnota da 20 francs. Ella è la segunda da la nova seria da bancnotas suenter quella da 50 francs ch'è dapi in onn en circulaziun.

La nova bancnota da davant.
Legenda: La nova bancnota da davant. Banca naziunala svizra

Sco la bancnota da 20 actuala sa basescha er la nova sin la colur cotschna. Ella duai cun in prisma e cun tgirallas simbolisar la creativitad da la Svizra.

Sco motivs èsi illustrà sin la bancnota nova da 20 francs ina tenda dal festival da film a Locarno, tgirallas ed in globus. La bancnota vegn messa en circulaziun ils 17 da matg. L'entira seria nova da las bancnotas stettia sut il tema «la Svizra multifara» communitgescha la banca naziunala.

La nova da 50

Avant bun in onn era vegnida introducida la nova bancnota da 50. Las bancnotas dad oz na correspundan betg pli al standard da segirezza d'ozendi. La nota da 10 francs suonda en il decurs da l'atun. L'introducziun da tut las bancnotas dura anc fin il 2019.

La nova bancnota da davos.
Legenda: La nova bancnota da davos. Banca naziunala svizra

La survista:

  • 2005 Concurrenza per grafichers elegida: La banca naziunala ha fatg ina concurrenza per realisar novas bancnotas da 50 francs. La concurrenza è stada sut il tema «Svizra liberala». Differents grafichers han pudì preschentar lur ideas a la concurrenza. Gudagnà ha il graficher da Turitg Manuel Krebs.
  • 2007 La segund plazzada survegn l’incumbensa: Era sch'il graficher Manuel Krebs ha gudagnà la concurrenza ha la banca naziunala communitgà, che la graficra Manuela Pfrunder vegn a concepir las novas bancnotas. Ella è stada la segunda da la concurrenza. Las bancnotas duain vegnir sin il martgà il 2010.
  • 2010 Retard per las novas bancnotas svizras: Las bancnotas novas da la Svizra han retard. Il termin vegn spustà sin l'onn 2012. Ils segns da segirtad stoppian anc vegnir meglierads e sviluppads.
  • 2011 Ils emprims prototips: La banca naziunala producescha prototips da las bancnotas da 50 francs. Il palpiri da las bancnotas è in novum e na correspunda anc betg a las pretensiuns da la banca naziunala. Il palpiri sto vegnir svilupà vinavant.
  • 2012 la segirezza na persvada: Pervi da problems tecnics ha la banca naziunala svizra spustà il termin da la seria nova da bancnotas. La banca naziunala vul para accumplir tut las mesiras da segirezza ch'èn pussaivlas sin il palpiri. Quai ha duvrà ses temp.

video
Cura che la veglia da 20 è cumparida il 1996
Or da RTR dals 10.05.2017.
laschar ir. Durada: 3 minutas 3 Secundas.

Artitgels legids il pli savens