«La strategia d'energia 2050 rinforza la Svizra»

Cun quests pleds ha la ministra d'energia Doris Leuthard lantschà la campagna da votaziun davart la lescha d'energia revedida. La lescha d'energia vul spargnar energia, sustegnair energia regenerabla e sortir successivamain da l'energia atomara.

Doris Leuthard e ses collegas dal Cussegl federal sustegnan la lescha d'energia. Bild in Lightbox öffnen.

Legenda da maletgs: Doris Leuthard e ses collegas dal Cussegl federal sustegnan la lescha d'energia. Keystone

Grazia a la lescha d'energia possia la Svizra reducir sia dependenza d'energias importadas e rinforzar l'energia regenerabla indigena. Uschia restian las investiziuns en Svizra, ha punctuà la ministra d'energia Doris Leuthard.

La lescha d'energia vul tranter auter promover il spargnar energia, sustegnair l'energia regenerabla e sortir successivamain da l'energia atomara. Novas ovras atomaras fissan scumandadas e las veglias duain vegnir mantegnidas entant ch'i èn anc segiras.

Vinavant dess la Svizra vegnir pli independenta da l'exteriur tge che pertutga l'import d'energia. Entant importescha la Svizra var 75% da l'energia da l'exteriur. Plitost ieli da stgaudar, benzin e gas. Cun las midadas en la strategia d'energia dess quella cifra vegnir sbassada. Realistic è tenor la ministra d’energia Doris Leuthard da sbassar l’import sin var 60%. La Svizra n'haja betg las resursas per sbassar extrem l’import. Dentant duai l’import vegnir sbassà tant sco pusseivel.

La strategia d'energia 2050 duai vegnir realisada pass per pass. Ed in emprim pass duai esser la revisiun da la lescha d'energia. Il Cussegl federal ed il parlament cusseglian perquai d'approvar la fatschenta. Il suveran svizzer decida ils 21 da matg en chaussa.

Referendum encunter la lescha d'energia

Cunter la lescha d’energia e vegni fat in referendum. Criticà vegnan oravant tut ils custs che stettian en connex cun la nova lescha. Tenor il comité da referendum s'auzan quels custs sin 3'200 francs dapli l’onn per ina chasada.

«  Ils adversaris fan in quint da fantasia! »

Doris Leuthard
Presidenta da la Confederaziun

Dentant quel argument na chapescha la cussegliera federala betg. Tenor sias calculaziuns datti mo 40 francs dapli custs ad onn per ina chasada da quatter persunas.

Era in punct da critica è che cun questa revisiun da la lescha datti anc dapli scumonds e birocrazia.

RR actualitad 12:00