Maridaglias sfurzadas – adina dapli dunnas sa dostan

En Svizra s'annunzian adina dapli unfrendas or dal sectur d'asil tar il post spezialisà per maridaglia sfurzada. L'onn passà ha il post tgirà passa il dubel da cas che l'onn avant, ha ditg la presidenta dal post spezialisà Anu Sivaganesan a l'agentura da novitads SDA.

Ina matta fitg guiuvna vestgida da spusa. Bild in Lightbox öffnen.

Legenda da maletgs: Ina spusa minorenna en India – er là è derasada la tradiziun da sfurzar minorennas en maridaglias. Keystone

Fertant ch’il post s’aveva occupà dal 2005 fin il 2015 cun in total da 94 cas da maridaglia sfurzada, è quella cifra creschida sulettamain l’onn 2016 sin 64 cas.

Mintga tschintgavel cas vegnia dal sectur d’asil, ha ditg Anu Sivaganesan a l'agentura da novitads SDA. Sco quai che l'evaluaziun mussia vegnan il pli savens dunnas giuvnas, savens schizunt minorennas, maridadas cunter lur veglia.

Maridaglia da minorennas sco «protecziun» sin la fugia

Il pli savens derivan ellas da la Siria, l’Afghanistan, l’Eritrea, l’Irac, l’Iran e la Somalia. Quai èn er actualmain ils pajais, danunder che blers requirents d’asil vegnan.

Anc adina valia la maridaglia sfurzada sco meglra protecziun per mattas minorennas en fugia. Tenor l’organisaziun per ils dretgs da las dunnas da l’ONU vegnian maridads sirians ed oravant tut sirianas minorennas en fugia quatter giadas pli savens ch’en il pajais sez.

Dunnas sa dustan pli e pli

Ch’i dettia tants cas na sa laschia dentant betg mo declerar cun la fugia, citescha l’agentura la presidenta dal post spezialisà. Anu Sivaganesan observa che las dunnas giuvnas èn pli e pli prontas da sa dustar per lur dretgs – quai er pervi ch’il stadi da dretg Svizra funcziuneschia bain.

Maridaglias sfurzadas or da tradiziun u sco mesira disciplinara

I dettia dentant er en Svizra maridaglias sfurzadas. Quasi adina è l’atgna famiglia quella che metta las dunnas giuvnas sut squitsch. Quai pervi che maridar giuven è tradiziun en lur pajais origin, u er per tegnair las dunnas giuvnas en lur agen circul cultural e na betg exponer ellas a la societad «decadenta» dal vest.

RR novitads 10:00