Martin Bäumle sa retira sco president dals Verdliberals

Il cusseglier naziunal da Turitg, Martin Bäumle, sa retira sco president da la partida dals Verdliberals. El vegnia a demissiun la fin d'avust a chaschun dal giubileum da 10 onns da la partida ha ditg Bäumle a Berna.

Martin Bäumle. Bild in Lightbox öffnen.

Legenda da maletgs: Martin Bäumle era il motor da la partida e 10 onns il president. Keystone

Dapi la fundaziun da la partida è Martin Bäumle president dals Verdliberals. Gia l’onn da fundaziun ha la partida recaltgà gist trais mandats en il Cussegl naziunal ed in en il Cussegl dals chantuns. Il punct culminant da fin qua ha la partida gì il 2011 cura ch'ella ha cuntanschì fermezza da fracziun cun 12 mandats en il Cussegl naziunal e dus sezs en il Cussegl dals chantuns.

Bäumle il motor da la partida

Las lavurs per la partida ha era custà tribut a Bäumle. Il 2012 ha el giu ina attatga da flaivlezza, il 2014 alura in infarct dal cor. Cun la partida èsi medemamain ì da la val giu. Uschia perdan ils Verdliberals tar las elecziuns parlamentaras il 2015 gist 5 mandats en il Cussegl naziunal ed en la Chombra pitschna n’è la partida betg pli represchentada.

Midada sin il sectur d’energia

Tuttina ha la partida Verdliberala influenzà ils ultims onns la politica a Berna. Cunzunt la midada sin il sectur d’energia e la strategia d’energia 2050 è vegnida influenzada per part dals Verdliberals. La refurma da vegliadetgna ha pir suenter ch’ils Verdliberals han midà opiniun chattà ina maioritad.

RR novitads 15:00