Siglir tar il cuntegn

Header

cuntegn

Svizra Meglra protecziun per lavurants pli vegls

La PS pretenda da proteger meglier lavurants pli vegls. Plinavant ha il president, Christina Levrat pretendì dapli engaschi per fugitivs. En vista a las votaziuns naziunalas dal zercladur n'han ils Socialdemocrats betg chattà in consens tar la dumonda da la diagnostica da preimplantaziun.

Dapli engaschi per fugitivs

Il president da la PS, Christian Levrat ha pretendì dapli engaschi per fugitivs a la radunanza da delegads da sia partida.

Als delegads da la Partida socialdemocratica ha Levrat ditg che la Svizra saja sco commembra da las cunvegnas da Schengen e da Dublin era cunresponsabla per la politica da migraziun europeica.

Perquai stoppia il cussegl federal s'engaschar che l'Uniun europeica sa sprovia da salvar uschè bleras vitas sco pussaivel e betg mo da proteger ils cunfins.

Plan per cuntanscher egualitad da paja

La PS aveva preschentà quest’emna in plan per cuntanscher l'egualitad da paja cun pli che 10 mesiras. A chaschun da la radunanza da delegads da sonda a Berna han ils Socialdemocrats discutà quest plan. El prevesa tranter auter in'autoritad independenta che controllescha sche firmas discrimineschan dunnas u umens. Tenor il president da la PS Christian Levrat perdan las dunnas mintg'onn 7,7 milliardas francs pervi da la discriminaziun.

E per valitar tuttina lavur pajada e betg pajada, duai tant la dunna sco l'um avair dabun 20 emnas pajadas suenter la naschientscha d'in uffant.

Proteger meglier lavurants pli vegls

La PS pretenda er da proteger meglier lavurants pli vegls. Ils delegads da la PS han approvà ina resoluziun che vul in scumond da la discriminaziun pervi da la vegliadetgna en la lescha ed en contracts collectivs da lavur. La partida vul reagir uschia sin il dumber creschent da dischoccupads sur 55 onns. Tenor la PS è quest dumber sa dublegià ils davos 10 onns.

Nagina parola tar diagnostica da preimplantaziun

En vista a las votaziuns naziunalas dal zercladur n'han ils Socialdemocrats betg chattà in consens tar la dumonda da la diagnostica da preimplantaziun. Ils delegads han decidì libertad da votar.

Las ulteriuras parolas èn 3 giadas gea per l'iniziativa per ina taglia d'ierta, per l'iniziativa da stipendis e per la nova lescha da radio e televisiun.

RR novitads 16:00

Artitgels legids il pli savens