Siglir tar il cuntegn

Header

La ministra da finanzas, Eveline Widmer-Schlumpf.
Legenda: La ministra da finanzas, Eveline Widmer-Schlumpf. Keystone
cuntegn

Svizra Nagina taglia sin il gudogn da chapital

Il Cussegl federal desista d'introducir ina taglia sin il gudogn da chapital sin vaglias. Quai suenter critica en la fasa da consultaziun. Ina tala taglia vuleva el introducir cun la Refurma da la taglia sin interpresas 3 per gulivar uschia ina part da las perditas d'entradas.

Il Cussegl federal ha preschentà oz ina versiun revedida da la taglia sin interpresas 3. Tranter auter duain privilegis da taglia per societads da holding vegnir abolids. Il Cussegl federal desista perencunter d'introducir ina taglia sin il gudogn da chapital.

PS smanatscha cun referendum

La Partida socialdemocratica smanatscha cun il referendum cunter la refurma da la taglia sin interpresas 3 sche las interpresas ed ils acziunaris na ston betg star buns cumplettamain per las perditas da taglia che sa resultan qua tras. Quest regals da taglia planisà, vegnan a custar al pievel svizzer passa ina milliarda francs ad onn.

audio
Mezdi: Refurma da taglia sin interpresas III
ord Actualitad dals 02.04.2015.
laschar ir. Durada: 2 minutas 29 Secundas.

PPS vul anc ir pli lunsch

La Partida populara svizra n’è era betg cuntenta cun las mesiras ch’il Cussegl federal preveda. Sche la Svizra veglia restar cumpetitiva en chaussa taglia e cunquai salvar la bainstanza e las plazzas da lavur, lura stoppian las mesiras anc ir pli lunsch. Uschia pretenda ella tranter auter che la tariffa da la taglia sin il gudogn, vegnia sbassada sin nivel naziunal da 8,5 sin 7,5%, per uschia dar dapli spazi d’agir als chantuns.

Travail.Suisse deplorescha decisiun

L'organisaziun tetgala dals lavurers Travail.Suisse deplorescha ch'il Cussegl federal desista d'ina taglia sin gudogn da chapital sco cuntrafinanziaziun da la Refurma da taglia sin interpresas 3.

Senza questa cuntrafinanziaziun entras l'economia, na vegnia la refurma betg ad avair ina schanza avant il pievel. Pertge sch'ins desistia da questa mesira, haja puspè il pievel da pajar ils custs dal program da spargn.

Artitgels legids il pli savens