Siglir tar il cuntegn

Header

cuntegn

Svizra Patrouille Suisse: Delegaziun visita lieu da disgrazia

Suenter ch’in aviun da la Patrouille Suisse è crudà giu la gievgia en l’Ollanda, visita ina delegaziun svizra il lieu d’accident a Leeuwarden.

Quella sa cumponia da commembers da la giustia militara, experts per accidents ed in team da tgira, communitgescha il departament federal da defensiun a Berna.

Tar la preparaziun sin ina show da sgol a Leeuwarden/NL eran dus aviuns da la Patrouille Suisse collidads. Ina maschina è crudada giu, il pilot ha pudì sa salvar cun il sez catapultabel. El è blessà levamain. Il segund eroplan ha pudì sa platgar normal.

Raschun per la collisiun n'è betg clera

Tenor il cumandant da l'aviatica militara, Aldo Schellenberg, è la collisiun capitada suenter che dus aviuns han sgulà ina figura solistica. Cura ch'ils ulteriurs eroplans èn returnads en la furmaziun hai dà ina collisiun. Ils motivs per quella n'èn anc betg enconuschents. L'accident vegn dentant examinà. I saja stà in exercizi da rutina, uschia Schellenber.

Sin maletgs d'amaturs è da vesair che l'aviun è crudà giu a la riva d'in lai. Il pilot è sa platgà en in iert. Tenor indicaziuns dals pumpiers saja el sa blessà levamain e saja en in ospital. Cun el giaja bain tenor las circumstanzas. Il segund eroplan ha in donn al guvernagl d'elevaziun. La Patrouille Suisse ha ditg giu sia partizipaziun a la show da sgol en l'Ollanda. I sa tracta da l'emprim accident en l'istorgia da 45 onns Patrouille Suisse.

RR novitads 09:00

Artitgels legids il pli savens