Il punct central da la revisiun da la lescha è da stoppar ulteriurs bajetgs ordaifer zonas da construcziun. Co che quai duai schabegiar ston lura ils chantuns fixar en il plan directiv. Els ston dar regularmain in rapport a la Confederaziun e far, sche necessari, adattaziuns.
Excepziuns per bajegiar ordaifer las zonas da bajegiar pon da nov ils chantuns reglar. Questa cumpetenza dals chantuns pussibiliteschia soluziuns fatgas sin mesira, han plirs votants e votantas ditg.
Ina premia da demoliziun
Per ch'edifizis che na vegnan betg pli duvrads svaneschan da la cuntrada duain ils chantuns pajar sut tschertas premissas premias da demoliziun per tals edifizis e stabiliments. Il cussegl naziunal ha precisà che l'edifizi sto esser vegnì construì legalmain.
Sche 1000 fin 2000 edifizis vegnissan disfatgs per onn e sche la premia fiss tranter 20'000 e 30'000 francs, fissi da far quint cun custs annuals da 21 fin 66 milliuns francs per ils chantuns. La Confederaziun po dentant pajar contribuziuns resguardond las entradas dals chantuns or da la taxa sin la plivalur per enzonaziuns.
Excepziun per territoris da muntogna
Utilisaziuns che n'èn betg liadas ad in lieu ordaifer zonas da construcziun ch’èn a favur dal svilup economic vul il Cussegl naziunal lubir mo en territoris da muntogna. Il Cussegl dals chantuns percunter ed er il Cussegl federal vulevan permetter quai dapertut en il pajais. Omaduas chombras vulan dentant che tschertas cundiziuns ston esser ademplidas, per exempel dovri mesiras da cumpensaziun.
Chasas purilas che na vegnan betg pli duvradas e bajetgs economics ch’èn colliads cun quellas na duain betg dastgar vegnir transfurmads per diever d’abitar. Quai ha il Cussegl naziunal decidì cun 101 cunter 82 vuschs. PS, Verds, GLP, ma era commembers da l'Allianza dal Center, PLD e PPS n'han vulì savair nagut da la pussaivladad da pudair utilisar meglier quests edifizis en l'avegnir.
Naginas «zonas da construcziun d'inslas»
Ils adversaris han argumentà che gronds bajetgs economics pudessan uschiglio daventar chasas da pliras famiglias mez la champagna. Quellas «zonas da construcziun inslas» muntassan in privilegi cha possessurs da terren na vessan betg en la zona da construcziun. La maioritad ed il minister da l'ambient Rösti vulevan lubir talas utilisaziuns sut la cundiziun che l'edifizi saja vegnì construì tenor il dretg vegl e ch'el haja avunda access.
Sut tschertas premissas vul ina pitschna maioritad permetter da demolir, da reconstruir e d'engrondir manaschis d'alloschament ordaifer la zona da construcziun. Quai na dess però valair per ustarias. Il Cussegl dals chantuns percunter vuleva dar questa pussibilità a tut ils manaschis ospitants.
