Sco emprimas fracziuns han la PPS, PCD ed ils Verds envidà oz ils trais candidats Ignazio Cassis (TI), Isabelle Moret (VD) e Pierre Maudet (GE).
PPS vul Ignazio Cassis
La fracziun da la Partida populara Svizra ha fatg ina votaziun suenter ch'ils trais candidats liberals èn sa preschentads: Ignazio Cassis ha survegnì 45 vuschs, Isabelle Moret 11 vuschs e be 1 vusch è ida a Pierre Maudet. Quai ha ditg il president da la fracziun Adrian Amstutz curt suenter il hearing en Chasa federala.
La PPS ha tuttavia in pled en il chapitel en l'elecziun dal Cussegl federal, cunquai ch'ella è cun 74 persunas la pli gronda fracziun en l'Assemblea federala. Al hearing dad oz n'eran dentant betg tut las commembras e tut ils commembers preschents.
Per la PCD èn tuts trais valabels
Era la fracziun cristiandemocratica ha tutgà il puls als trais candidats. Sco la PCD communitgescha, sajan tuts trais candidats elegibels e qualifitgads per la successiun da cusseglier federal Didier Burkhalter. Ins veglia discutar vinavant l'elecziun en la sesida da fracziun da l'emna proxima.
Nagina recumandaziun dals Verds
Sumegliont vesa quai er ora tar la fracziun dals Verds. Er ella è anc indecisa. Sco Balthasar Glättli, president da fracziun di, na sajan els anc betg vegnids tar in resultat. El giaja da quai anora ch'els infurmeschian l'autra emna davart lur decisiun. Per ils Verds saja la presentaziun dals candidats stada da buna qualitad. Els hajan respundì avertamain.
Las ulteriuras fracziuns han planisà proxim mardi, 19 da settember, ils hearings cun ils trais candidats. L'Assemblea federala elegia ils 20 da settember ina nova cussegliera federala u in nov cusseglier federal.
RR actualitad 17.00+