Siglir tar il cuntegn

Header

cuntegn

Svizra Strategia d'energia 2050 – Cler «gea» per la lescha d'energia

La lescha d'energia è approvada dal suveran Svizzer. 58,2% han ditg gea a la lescha.

Energiegesetz

Svizra: Lescha d'energia

  • GEA

    58.2%

    1'321'947 Vuschs

  • NA

    41.8%

    949'169 Vuschs

Cun 58,2% di la populaziun gea a la lescha d'energia. Be tschintg chantuns han ditg na a la lescha. Uschia è la resposta da la populaziun svizra fitg clera. I na duai betg dar novas ovras nuclearas e las energias regenerablas duain vegnir sustegnidas. Las reacziuns dal comité per la strategia d'energia ma er d'auters èn positivas.

Bleras tecnologias èn quà, il knowhow (la savida) è er quà – lain cumenzar a nizzegiar quest potenzial.
Autur: Doris Leuthard Cussegliera federala

La ministra d'energia, Doris Leuthard ha ditg en ina conferenza da pressa che la populaziun svizra saja sa decidida per ina nova politica d'energia. Da sortir pass per pass or da l'energia atomara saja la dretga decisiun. Cun la lescha dad oz saja il fundament mess. Segir, schuber, svizzer, innovativ e pragmatic duai la proxima etappa per la strategia d'energia 2050 vesair ora.

Il comité per la strategia d'energia è cuntent

audio
Baltasar Glättli dal comité per la lescha d'energia
ord Actualitad dals 21.05.2017.
laschar ir. Durada: 26 Secundas.

Il comité per la strategia d'energia beneventa sa chapescha la decisiun dal pievel Svizzer dad approvar la lescha d'energia. Quai saja in pass en direcziun energia schubra, indigena e regenerabla.

Igl è ina decisiun a lunga vista che procura per in futur cun energia persistenta, effizienta e svizra.
Autur: Andy Kollegger Deputà dal cussegl grond, co-president dal comité per la strategia d'energia

Fitg sumegliant tuni era da la PCD Svizra. La decisiun fermia la producziun da products indigens e segireschia la sortida da l'energia atomara.

Comité cunter la lescha guarda sin la detta als aderents

audio
Christian Mark dal comité cunter la lescha d'energia
ord Actualitad dals 21.05.2017.
laschar ir. Durada: 30 Secundas.

Il comité cunter la lescha d'energia communitgescha ch'els spetgian uss dals aderents da tegnair en lur empermischun dals 40 francs. Plinavant saja ussa da sclerir svelt tge pussibladads ch'i dettia per garantir avunda energia er l'enviern cura ch'i dettia nagin sulegl e nagin vent.

Oz n'èn anc nagins problems vegnids schliads.
Autur: Christian Imark Comité cunter lescha d'energia

Er la PPS Svizra sco era quella dal Grischun regordan ils aderents ch'els hajan ussa da tegnair en lur empermischuns e ch'els hajan da segirar il provediment cun energia favuraivla e sur tut cun avunda energia.

Las retschertgas da gfs.bern avant la dumengia da votaziun

Il Cussegl federal ed il parlament recumondan d'acceptar la lescha. L'emprima retschertga da l'institut gfs.bern avant las votaziuns mussa ina clera tendenza per la lescha d'energia. 61% da las persunas cun dretg da votar en Svizra avessan ditg gea a la lescha. En la segunda retschertga è il sustegn sa sminuì. Be pli radund 56% dals Svizzers avessan ditg gea a la lescha.

Spargnar energia e sustegnair energia regenerabla

La lescha d'energia vul spargnar energia, sustegnair energia regenerabla e sortir successivamain da l'energia atomara. La lescha duai esser in emprim pass per realisar la strategia d'energia 2050.

Grischun di gea cun 58,7%

Il suveran Grischun di «Gea» a la lescha d'energia. I va per cuntinuar cun cun la strategia d'energia 2050 sin nivel federal.

  • Las 112 vischnancas han ditg «Gea»
  • cun 58,7% da las vuschs
  • En cifras absolutas: Gea: 30'963 Na: 21'748

Bleras reacziuns positivas

La cuminanza d'interess dals cumins concessaris grischuns beneventa la decisiun dal Grischun che ha approvà la lescha d'energia. Quai saja in bun di per las vischnancas grischunas che sajan dependentas da las concessiuns d'aua.

Uschia restia l'aua l'energia la pli valurusa che possia er producir energia cura ch'i suflia nagin vent ed er il sulegl na glischa betg.

Er la PS Grischun è fitg cuntenta cun la decisiun dal suveran Grischun. Cun adina pli chauds envierns cun adina pli pauca naiv saja impurtant da cumbatter la midada dal clima. Quai stoppian ins far cun metter en l'energia adina pli effizientamain e cun duvrar energia regenerabla. Quai sajan grondas schanzas per il Grischun.

video
Strategia d'energia: Tge munta quai per las ovras idraulicas en Grischun?
Or da Telesguard dals 21.05.2017.
laschar ir. Durada: 6 minutas 36 Secundas.

RR novitads 12:00

Artitgels legids il pli savens